Ua tele le mau faamatalaga e faitioina ai le gūgū pea o le Soifua Maloloina i le faalauiloaina o le pepesi o le faama‘i o le Dengue Fever i Samoa le Fiva o le Ponaivi. Ua lua vaiaso o agai i ai mo se faamatalaga aloaia ona o le siisii pea i luga o le numera o tagata ua aafia i lea gasegase i Amerika Samoa ae e leai lava se taimi avanoa o le Ofisa Sili ia Toleafoa Leausa Dr Take Naseri e faatatau i le gasegase.
Ae mae‘a tala mai i Amerika Samoa i le oo atu i le toafā (4) ua maliliu i totonu o le lua masina o lea gasegase i le teritori, ae faatoa ta‘u e le Ofisa Sili o le Matagaluega i le Samoa Observer le tulaga ua iai. O le mae‘a lea ona faalauiloa e le TVOne i le atunuu ua toatele ua maua i le gasegase ae e lē o iai lava se upu aloaia mai le Soifua Maloloina.
Na tau saili mai i Amerika Samoa se faamatalaga lea na maua ai o le vaiaso na tea nei, ua oo atu i le to‘a 63 i latou ua aafia i totonu o le lua vaiaso, mai i le amataga o Iulai. O le tala lea ua faalauiloa nei i le nusipepa o le Samoa Observer e le Matagaluega o le Soifua Maloloina ua faapea mai ai, o lea ua tolu vaiaso o Iulai ae ua oo atu i le to‘a 121 tagata ua faamauina ua maua i le gasegase.
O le auga atoa o le faamatalaga a le alii Ofisa Sili o le matagaluega e ui i le silia i le to‘a 100 ua maua i le gasegase, e aofia ai ma nisi ua tigaina, “… e lē o iai se isi ua maliu i lenei taimi ma e lē o iai se manaoga e faapopoleina fua le atunuu”.
O lea la ua aloaia ua pepesi le faama‘i ae e lē o iai se tui e mafai ona taofia ai le Dengue i Samoa na o fautuaga e vave vaai se fomai pe a vaaia auga o le ma‘i.
O le faafitauli lea ua tele ina sasi ai foi le tele o faamatalaga o gasegase ona o le tau puipui lava o le Matagaluega o le Soifua Maloloina nei faapopoleina le atunuu. O le faafitauli i tusitala o le tulaga lea a tulai mai la ni aafiaga ogaoga ae ua toe tapa mai i fesootaiga ma tusitala mo le faalauiloa ae ua ese foi le tele o faamatalaga ua fai.
O le taumafaiga na oo lava i Amerika Samoa e tau saili mai ai faamaumauga o Samoa lava ia ae e oo lava i le afiafi ananafi i le alii fomai o loo i le tulaga o le Sui Ofisa Sili, e po lava o fai fonotaga ma ua lē mafai ona sau ai pe moni faamaumauga ua ave i le nusipepa ae aisea ua lē faalauiloa aloaia ai le tulaga o lea ua pepesi le faama‘i i Samoa.
O auga o le ma‘i lea e feaveai e le namu o le maualuga o le fiva poo le vevela, o le tiga o sooga o ponaivi, o le faasuati atoa ai ma le niniva faasolo atoa o le ulu.
O le fanau laiti i lalo o le 10 tausaga lea ua faapea mai e tigaina lava pe a aafia ai i lenei gasegase.
I Amerika Samoa lava ia ua latalata i le to‘a 200 i latou ua aafia ma ua faapea ona aumai se vasega o fomai faapitoa mai i Amerika e fesoasoani i le falemai o le LBJ i Nuuuli auā le tali atu i le toatele ua aafia ma ua tau faiifo i lenei vaiaso le numera o tagata tigaina i lenei gasegase.
Faapea mai le Matagaluega o le Soifua Maloloina i luga o le nusipepa, ona pau lava le galuega o loo unaia o le faatama‘ia o nofoaga vaivaia e tuufua ai le namu e maua ai le atunuu i le dengue fever.
