O se faamatalaga lea ua maua mai i le alii pule o le Kamupani o le Wylex i Samoa, le susuga Eddie Wilson.
O le kamupani lenei e pei ona silafia e le atunuu, o lea na gaosia le sukalati ma avatu le ava Samoa i Europa, ae o se mu na faatamaia uma ai le falegaosi oloa a lenei aiga i Moataa lea na matuā toe vaaia ai le telē o se faaletonu i ia foi ituaiga pisinisi.
Ona pau le tulaga mautinoa o le susuga Eddie e lē o se tagata e nofoa‘i ma a o faagasolo ai faamasinoga ina ia tau saili ai le faaleagaina o lenei falegaosi oloa i Moataa, na see ane loa Eddie ma si ona faletua o Carol i Lelata i le fanua o le aiga o le faletua ma amata ai isi foi taumafaiga auā lava le manaoga e aua ne‘i motu le sailiili ma le suesue i nisi oloa e mafai ona gaosi i Samoa ma ia mafai ona agai atu i fafo le faatauga.
O lea ua tusa ma le lima nei tausaga talu ona faagasolo le fasimoli tamea, le moli taele ma le pauta tamea, lea na malaga ai lava lenei alii i Amerika i Saute e saili poo le ā le auala lelei a o ā foi ni fua o laau e mafai ona faatautaia ai le gaosiga o nei oloa.
O lea foi la ua faagasolo le faatauina i Samoa ma ua saili i tuaoi o Samoa isi maketi ina ia faatau ai nei oloa.
O le pauta ma le fasimoli taugofie lea ua iai nei i Samoa auā o le tele lava o le galuega i le gaosiga o ia oloa o loo aumai i oa faalenatura o loo maua i si o tatou lava atunuu.
E lei gata ai ii taumafaiga a Eddie Wilson ma lona faletua. O lea foi na amata ai lava ma se atina‘e ua gaosi ai atigipusa tuu oloa ma pepa iila e lelei i le siosiomaga.
O le amataga la o le tausaga lea na faapea ona fesootai ai loa lenei alii faipisinisi o Samoa ma se kamupani mai i le malo tele o Saina, ina ia taumafai lava e saili se auala e mafai ona faalautele ai lea foi itu o le pisinisi a le Wylex.
O le maliega i le va lenei ua faamautu tau i pisinisi i le kamupani o le Wylex faapea ai ma le kamupani lea e ta’ua o le HIFA Packraft mai i le aai o Xiamen i Saina o le a mafai ai ona gaosi atu atigipusa i Samoa nei ma faatau atu i se tasi o kamupani tele e faaaogāina atigipusa i Ausetalia.
O le Wylex ma lana atina‘e lea o atigipusa ua mafai ona faatau atu a latou oloa i isi atunuu o le Pasefika e aofia ai ma Amerika Samoa.
O le fesoasoani la o le a maua mai e ala i lenei faiga faapaaga o le a faatotoga ai e le kamupani mai Saina le nofoaga o loo iai nei a le Wylex i masini faaonaponei. E lē gata i lea o le a faia a‘oa‘oga i tagata faigaluega ina ia mafai ona faaauau pea le lelei o masini mo lea atina‘e.
E lei mamao nei se taimi na malaga mai ai i Samoa pule e toalua a le kamupani mai i Saina ina ia faamautu ai lenei va galulue faatasi.
Na ta‘ua e Eddie Wilson o le a saili e le kamupani mai Saina se pule mai i Niu Sila, ae faamautu i Samoa nei auā le faatinoga o galuega a lea kamupani.
Faaalia e le pule sili o le kamupani mai i Saina o Cha Musen, o le mafuaaga o le agai mai i Samoa mo le atina‘e ua fai nei ona o le manatu o Samoa o loo malosi le lagolago a lona Malo i faiga faapaaga faapea ma o se auala foi e tali atu ai i le lelei o uiga talimalo o tagata Samoa.
