Ole olaga tauivi o alo ma fanau i Samoa ile suesue ma sailiili i tomai faaonaponei, faapea tomai faapitoa i soo se agavaa, e talitonu ole tulaga foi lea oloo iai alo ma fanau a Samoa na soifua a‘e i Niu Sila ma fanau na soifua a‘e i Samoa o laiti o latou tausaga, ae na tuua le atunuu ae malaga atu ma aiga pe malaga atu foi ini sootaga faaleaiga ona ole fia sailiili matagi ile itu i aoaoga.
Ose tala fiafia ua faailoa mai ise pepa o faamatalaga faalauaitele mai le Iunivesite o Waikato, le sili aoao ose tamaitai Samoa oloo aoaoina ile iunivesite i togi ole suega ole NCEA Samoan scholarship ile tausaga ua mavae 2016.
Ole tamaitai o Foa Samuelu ua 18 tausaga lona matua, ua ia ausia lea sitepu maualuga i totonu ole Iunivesite. O Foa na soifua a‘e i Samoa ae ole lua o ona tausaga na malaga atu ai ma aumau i Niu Sila ma sa faaiuina ana aoaoga ile vasega maualuga ile aoga ole Auckland Grammar ma ulufale ai ile iunivesite o Waikato.
Oloo ave nei ana mataupu mo le fia maua o ona faailoga i mataupu tau tulafono faapea lona sailiiliga i tu ma aganuu a tagata Maori.
