Ua lagomau mai i ti’asa tuaa ma tupu na asaina le gas`u, na masaa le toto ma sauaina toa o le atunuu, ave faatagata o taua nisi tamalii ma faaaunuua i atunuu ese, aemaise o le tagata valeina o Tupua Tamasese Lealofi le tolu e fitafita papa’e mai Niu Sila.
O le afioga ia Pulotu Canada Mcathy ose tamalii iloga i nisi o polokalame i TV a Niu Sila i nai futia ua alu, ae ua tele nei ina faaalu ona taimi ma lana taleni i le faatinoina o le tala lenei i le Mau, pei ona sa maimoa i ai le mamalu ma le paia lasilasi o le atunuu lautele i le aai i Melepone i le afiafi o le Aso Faraile na tuanai atu, ose faaaliga ma se faatinoga na lavatapena ma saunia lelei, ma malamalama gofie ai alo ma fanau ona na faatinoina i le gagana Samoa ma le faa Peretania.
E le gata i lea ua mafai ona tuu i ai ma nisi vaega e faamatagofie ma malie ai i le matamata e pei ona sa tusia ai e le afioga a Pulotu le tala, o nisi o le aufaigaluega o galulue faatasi ma le afioga a Pulotu na malaga mai Niu Sila, Perisipeni faatasi ma nisi na ofo atu taleni mai le aai o Melepone lava.
O le afioga ia Aumua To’afa Te’o ose tamalii lauiloa foi i nisi o ata tifaga faa Samoa sa galue ai aemaise foi o lana taleni pese, peitai o lea ua ofo foi lana taleni ma galulue faatasi ma le afioga ia Pulotu.
Na maitauina le faatumulia o le malu mo faafiafiaga faapitoa faapenei le Rivergum Performing Centre i le pitonuu o Hampton Park na faataunuu ai le faamoemoe matagofie, na o le tasi la latou faaliga i Melepone, ae na saunoa le afioga ia Pulotu, tausaga fou pe a aulia, o le a toe foi mai ai ma le vaega lua faapea foi le vaega tolu pe a talafeagai ma fuafuaga, faalautele e le Atua lo tou valaauina, maua pea finagalo e faataunuuina ai taleni ma meaalofa aua le silamaimoa a Samoa.