Ua vaaia le matagofie o foliga fou o fale ua fausia e Saina mo le malaevaalele faavaomalo i Faleolo ma ose galuega ua faamoemoe e mae‘a ile tausaga nei.
Ole tasi lea o fuafuaga ale Malo e fesootai ma taumafaiga e afea Samoa e ni vaalele tetele o kamupani vaalele i Asia ma isi atunuu ole lalolagi, ina ia mafai ona maua avanoa lelei e afea ai le atunuu e tagata tafafao, ae maua ai foi avanoa mo tagata e fia tuua Samoa ma malaga i isi atunuu auā ole a faigofie pe a afea e ia kamupani vaalele le atunuu.
Ole vaiaso ua mavae na sainia ai le maliega ele Malo o Saina ma Samoa ole a tatala ai malaga a vaalele o lea atunuu e afea Samoa.
E lē fesiligia la ole a toatele turisi mai Saina ma isi atunuu Asia e afea Samoa mo ni malologa ma tafaoga. O fale kasino ua iai nei ile atunuu ose isi lea maketi lelei mo turisi mai Saina.
Na folasia ele afioga ile Palemia ise faatalanoaga ile vaiaso ua mavae se fuafuaga e toe faatu le kamupani vaalele ale atunuu, ae ua faaalia e Tuilaepa e mafai ona toe faatu lea kamupani vaalele e aunoa ma ni vaalele ae faipaaga ma isi kamupani vaalele e faaaogā ai o latou vaalele e faimalaga mai ai turisi ma o tatou tagata.
Ole kamupani vaalele ole Emirates, ose tasi o auaunaga tau malaga ile ea e lauiloa ile lalolagi, ma ole isi lea kamupani vaalele oloo fuafua e faia ni feutanaiga mo le malaga mai o latou vaalele ma afea le atunuu.
Fai mai le Palemia e sili ona vave malaga a ia vaalele i isi atunuu oloo feoai iai ona vaalele pe a ui mai i lenei vaega ole lalolagi ma afea Samoa. Ose tulaga e mafai ai foi ona pa‘ū le pasese mo tagata faimalaga. O vaalele mai Saina e vave foi a latou malaga i isi atunuu pe a ui mai i Samoa.
Ole faamautu ole maliega e malaga mai ai vaalele o Saina ma afe i Faleolo ole isi lea laasaga tāua i fuafuaga ale Malo e saili ni avanoa lelei e faateleina ai turisi e malaga tafafao ile atunuu, auā o lea ua tele faletalimalo aemaise o faletalimalo sili ona lauiloa ile lalolagi ua fai paaga ma nisi o pisinisi tau faletalimalo i Samoa.
Ole Sheraton Aggie Greys Hotel, ma le Taumeasina Resort faapea isi faletalimalo tumatafaga i Samoa ua avea nei ma taula‘iga o fuafuaga alualu mamalo mo le siitia ole atinae o tagata tafafao.
