O le vaiaso talu ai na tatala aloaia ai i Sini le faaaliga o Oloa mai Samoa i lalo o le faamalu a le S.A.M.E poo le Asosi a le au gaosi Oloa a le atunuu. O lenei faamoemoe na faagasolo i le pitonuu o Liverpool ma Hoxton Park i le Faletalimalo a le Mercure.
Na lē faataunuuina le Ava o le feiloaiga na oo atu ai le afioga a le konesula i le Fono e lua a Samoa i Sini auā na tuai taunuu mai le Afioga i le Sui palemia Lauofo Fonotoe Pierre Meredith faapea le afioga i le Fofoga Fetalai ia Laauli Leuatea Polataivao Schmidt vaganā ai le toatele o le au faipisinisi na muamua taunuu mai.
E ui i lea o le Aso Gafua na amata ai loa le faaaliga mo le lua aso i se sauniga Lotu sosoo ai ma le Saunoaga autu a le Afioga i le Sui palemia le afioga Lauofo Fonotoe Pierre Meredith. O le auga o le faamoemoe o le Malo ina ia amata ona saili maketi mai fafo e lē gata o se oloa e tasi ae o se numera tele toe eseese e ono faamausali ai ni manaoga o tatou tagata faapea ai kamupani tetele.
Afai e tupu ma olaola o lona uiga o le a tele foi le manaoga mo oloa Samoa ma maua ai ma alagamanuia a le au faifaatoaga faapea pisinisi laiti ma lapopoa i Samoa.
O le aso muamua lava na vaaia ai foi se faaaliga o laei poo se Fashion Show na faatautaia e le faleofu iloga a MENA. Na amata ai foi ma le tofoina e le mamalu o le atunuu o taumafa, pia, siamu, sosi feu, palusami, taro Samoa aemaise le Niu Voka ma le uaina mai le faletua o Lata Rankin.
I le itu tau galuega taulima na vaaia le matagofie o taulima, tautaliga, tanoa. O se tasi o oloa fou o le ga‘o mai le popo (Cocosina) e aunoa ma se cholesterol e faaaogā i kuka ma taumafa mai le afioga Samau Etuale Sefo ma le faletua ia Alison.
O le faguu Samoa o se tasi lea o matafaioi a le susuga Edwin Tamasese ae o le Noni poo le sua o le Nonu na matuā alumia e pei ona aumaia e le Afioga Faumuina Apulu Lance Polu ma le faletua ia Angie o le Talamua.
O chips taro, fa‘i ma le Vai tuufagu Samoa, siamu popo o nisi o oloa na faatauina e le tamaitai o Vicki Vaai. Na saunoa foi le alii Pule o le Invest Samoa Afioga Pulotu Lyndon Chu Ling o loo tatala foi le avanoa i o tatou tagata i fafo ma ni a latou paaga e resitara ai ma faia ni saofaga faatupulaia mo le lumanai i Samoa auā le alamanuia.
Na taualuga lenei faamoemoe i le aso lona lua i se Siva na faatautaia mo se seleni auā le faigamalaga e pei ona saunoa i ai le sui sooupu ia Tiumalumatua Fetu o le Iniini lea sa galulue ma le Ofisa o le Konesula ma le S.A.M.E.
Na afifio atu foi le mamalu o le atunuu ma totogi a latou ulufale $30 ma ulufale atu ai e feiloai i le aumalaga ua manava a latou galuega faafetaua‘i. E $10 le tau o le taumafataga na faapea ona tua i ai le mamalu o le aofia i le taualuga ai o lenei faaaliga mataina muamua.
