Silasila loia i moliaga e 233 o faatonu ole kamupani nonu i Vaitele

Ole susuga Laaulialemalietoa Leuatea Schmidt ile itu taumatau ma nisi sa auai e tapuaia le faamasinoga ile valaauga muamua o moliaga
Ole susuga Laaulialemalietoa Leuatea Schmidt ile itu taumatau ma nisi sa auai e tapuaia le faamasinoga ile valaauga muamua o moliaga

Ole Aso Lua ole vaiaso nei e toe valaau ai le faamasinoga o faatonu e toatolu ole kamupani nonu ole Local Partners and Associates i Vaitele, ma se tagata faigaluega ole kamupani e aofia ai ma le faletua o lē sa avea ma Minisita o Faatoaga ma Faigafaiva ma se tagata faigaluega.

E lei tuuina atu ni tali ale toalima oloo molia e aofia ai Laaualialemalietoa Leuatea, Apulu Lance Polu, Martin Schwalger, Heather Tupea Schmidt, ma Tuitui Aiolupo.

Oloo iai le faamoemoe ole valaauga ile vaiaso nei ole a tuuina atu ni tali a i latou i moliaga e 233 a leoleo ua faamautu lea na folasia ele loia a leoleo ile faamasinoga faaitumalo ina ua toe valaau le mataupu ile Aso Lua ua mavae.

Ole valaauga ile vaiaso nei ole a fofogaina ile faamasinoga maualuga le Supreme Court.

I faamaumauga ale faamasinoga oloo faaalia ai e 161 moliaga faasaga ile susuga Laaulialemalietoa Leuatea Schmidt, 51 moliaga ua faia faasaga ile susuga Apulu Laneseletoa Polu, 13 moliaga ole tamaitai faigaluega o Tuitui Aiolupo, fitu moliaga o Heather Tupea Schmidt, ae tasi le moliaga faasaga ile isi faatonu ole kamupani o Martin Schwalger. Ole vaevaeina o moliaga uma nei o Apulu Lance Polu e taitasi moliaga ole faaaogā ose faamaumauga taufaasese, faia ose gaioiga taufaasese, lima tagoese, ae 16 moliaga taitasi o moliaga e tolu ole maua oni tupe mai ni faiga solitulafono, faia ose gaioiga solitulafono na mafua ai le gau ose tasi mai se taumafaiga tau pisinisi, ma le limatagoese ise gaioiga e faia ese tasi e iai sona sootaga vava lalata faaleaiga. O lona uiga e 32 moliaga ia pe a tuu faatasi moliaga tai 16 e tolu ona maua ai lea ole aofaiga e 51.

O Laaulialemalietoa Leuatea Schmidt e 88 moliaga ole limatagoese ise gaioiga na faia e se tasi e iai sona sootaga vavalalata faaleaiga, 16 moliaga ole faia ose gaioiga solitulafono na mafua ai ona oo le gau ise isi tagata e aafia ini faiga faapisinisi, 16 moliaga ole faia oni gaioiga solitulafono le obtaining by deception, 40 moliaga ole limatagoese straight theft, ae tasi le moliaga ole faia ose gaioiga taufaasese poo le forgery.

O Heather Tupea Schmidt e tasi le moliaga ole limatagoese, 3 moliaga ole faia oni gaioiga solitulafono, ma le isi 3 moliaga ole limatagoese ise gaioiga e fesootai ma se tagata e iai sona sootaga vavalalata faaleaiga.

O Tuitui Aiolupo e fitu moliaga ole faia ose gaioiga na mafua ai ona gau se tagata faipisinisi, ae ono moliaga ole limatagoese ise gaioiga ma se tasi e iai sona sootaga vavalalata faaleaiga.

O Martin Schwalger e tasi le moliaga ole faia ose gaioiga taufaasese le forgery.

O lea ua talia ele faamasinoga le talosaga ale loia mo i latou oloo tuua’ia e tuu atu se vaiaso se’i silasila ai i moliaga uma a leoleo.

Ua talia ai foi ma le talosaga ale loia ale itu a leoleo e tuuina atu moliaga uma e 233 e valaau ma suesueina ile faamasinoga maualuga. Ua mafua lea talosaga ale itu a leoleo ona o moliaga ole forgery oloo molia uma ai i latou e toalima, e le oo iai le malosi ole faamasinoga faaitumalo ae na’o le faamasinoga maualuga.