Ua amatalia nei le galuega ale Samoa Rugby Union auā le sailia ose auala agai atu i luma mo le manuia ole Manu Samoa. Na faatalanoaina ai le CEO ole SRU Faleomavaega Vincent Fepuleai e faatatau i faaletonu ua feagai ai ma le Manu Samoa, ae poo le ā foi le lumanai ole ‘au aemaise le alii faiaoga o Namulauulu Alama Ieremia.
Faaalia le lagona ole CEO e faapea, ole filifilia o Namulauulu Alama Ieremia e avea ma faiaioga ole Manu Samoa, na manino lelei lana matafaioi na faataoto iai, ole sailia lea ole avanoa ole Manu Samoa mo le Ipu ole Lalolagi i Iapani (RWC) ile 2019.
Peitai, o lea ua mae’a taaloga ale Pasefika (Oceania), o Fiti ma Toga ua maua o la avanoa, ae oloo tu faaletonu pea le Manu Samoa e lei maua se avanoa mo le Ipu. Ole fua lea oloo fuaina iai le agavaa ma le galuega a Namulauulu e avea ma faiaoga ale au ale atunuu. E le gata o lea lava e lei maua se avanoa mo RWC, ae ua sosoo ai faia’ina e fitu, talu ona avea Alama Ieremia ma faiaoga.
“Ua matuā faanoanoa tele le Iuni faapea foi le atunuu atoa oloo tapuaia le Manu Samoa,” o saunoaga a Faleomavaega. “Na tau lelei mai le au ile taaloga ma Toga, sa tatau foi ona tatou malo ile taaloga lea. Na iai foi ma le faamoemoe ole taaalo ai ole au i luma ole tapuaiga ale atunuu i Apia Park ile taaloga ma Fiti sa tatau ona sili se tulaga e oo iai le taumafai ole Manu Samoa peitai e le ole tulaga lea na iai le faaiuga o lea taaloga.
Ae ole itu sili ona tāua ole a tilotilo iai le Iuni, ole galuega a Namulauulu, ole fesili tele oloo tulai mai, pe o Namulauulu le tagata tonu e tatau ona avea le Manu Samoa ile Ipu ole Lalolagi i Iapani.
Oloo iai pea le avanoa e sao ai le Manu ile RWC. Ole a tapena nei le au e taalo ma le au e lona lua mai Europa, oloo masalomia ose isi o Rusia ma Romania e sao mai. A manumalo mai iina ona maua ai lea ole avanoa ole Manu ile Pool A, oloo faatalitali mai ai Ireland, Scotland ma Iapani.
A lē sao le Manu mai taaloga ia i Europa, ole a tapena atu loa ile Repechage. Ole avanoa mulimuli lea mo se avanoa ile Pool B oloo faatali mai ai Niu Sila, Aferika i Saute ma Italia. O lona uiga, ole avanoa e pito sili ona manaia ma lelei mo Samoa ole Pool A.
E faigofie atu le Pool lea ile Pool C, lea ua ofi atu iai Toga oloo faatali mai ai Egelani, Farani ma Argentina.
Ile tulaga ole faiaoga, oloo silasila pea iai le Iuni ale atunuu, pe o Namulauulu e tauaveina le au pe leai foi. E iai foi le leo ole RWC, ile sailia ose faiaoga fou pe afai ole a faamalolo Namulauulu, auā ole World Rugby, e totogia faiaoga uma o ‘au e tausinio ile RWC.
Na ta’ua e Faleomavaega, o Namulauulu ose tagata faigaluega e amanaia tele ele SRU. Peitai, e fua lana galuega ile tulaga oloo iai le Manu Samoa ile taimi nei.
Ole tulaga mautinoa e le o lelei le galuega a Namulauulu. A mae’a suesuega ole a faia loa ma le faaiuga ale SRU mo le tofiga faiaoga.
E lei faailoa maia e Faleomavaega se umi ole suesuega faapitoa. Ae e foliga mai ole a suia le faiaoga ae e lei oo ile faaiuga ole tausaga, ile malaga ale Manu Samoa i Europa ile masina o Novema.
Ole malaga lea ole a taaalo ai ma Sikotilani, Egelani ma Romania. A faapea e faaauau ai pea le faiaoga o Namulauulu, o lona uiga ole a ia aveina le ‘au i Europa ia Novema. Afai e le avea e Namulauulu le au i Europa, o lona uiga ole a suia foi ma le faiaoga ole ‘au mo le RWC.
E le lava se taimi e aumai ai se isi faiaoga fou ile tausaga fou ae toe tasi le tausaga oo ile RWC.
E ao lava ona fai se suiga ile taimi lenei pe afai e moomia ona faia se suiga ile tofiga faiaoga ole Manu Samoa.
