Ua folafola e le Palemia susuga Tuila’epa Lupesoli’ai Sa’ilele Malielegaoi, e le popole pe fia miliona e faaalu e faia ai sailiga mo le fia maua o tagata oloo faia tuuaiga pepelo ma taufaaleaga i luga ole facebook ma isi auala o fesootaiga faaonapo nei

Ua folafola e le Palemia susuga Tuila’epa Lupesoli’ai Sa’ilele Malielegaoi, e le popole pe fia miliona e faaalu e faia ai sailiga mo le fia maua o tagata oloo faia tuuaiga pepelo ma taufaaleaga i luga ole facebook ma isi auala o fesootaiga faaonapo nei

E lē o nofonofo le Malo ile faasolo pea o suesuega oloo galue ai le Loia Sili ale Malo mo le sailia o tagata oloo faia tuua’iga pepelo ma tuua’iga taufaaleaga i luga o fesootaiga televavave faaonapo nei e pei ole api o foliga le facebook.

E lē o toe pogisa le atunuu i ia tuua’iga oloo salalau i luga o fesootaiga televavave lea oloo faasagasaga ai manatu ole toatele ile Palemia ma lana pulegamalo. Ua oo lava foi i nisi o tamalii ma faletua oloo tu lelei i galuega ma pisinisi ua mimilo iai tuua’iga oloo faitau ai le toatele i soo se vaipanoa ole lalolagi. Ole Aso Tofi ua mavae na toe faalogoina ai le finagalo ole ta’ita’i ole Malo ile mataupu lenei.

“Ua e iloa foi a oo loa ile suega ole mea moni e lē toe taofiofi loa le Malo. O lea foi la ua ou faatonua nei le Attorney General pe oo ile fia miliona fai le mea lea, aua ne’i toe tuua, ole a liliu atu loa le Malo e tagofia mea ia, pe oo a ina kipi loa ma le facebook ona lē toe faaaogāina loa lea e o tatou tagata. O mea na ua oo iai le tele o Malo, o lea sa taofiofi a le Malo ona o tulaga aogā. E toalaititi a i latou oloo iai uiga leaga oloo iai mo mea o ituaiga mafaufauga leaga, ae lalafi i tua la e faapea o lae lalafi i tua o la e malu, ae ua leva ona ou iloaina”. E lei mafai e Tuilaepa ona ia faailoa suafa oi latou oloo ia silafia oloo faia faasalalauga faasaga atu ia te ia ma lana faigamalo. Ua fiu foi e taumafai atu ile Loia Sili mo sona finagalo poo ai suafa o tagata ia ae pe toafia.

E lē o misi se aso ole vaiaso ma ia faasalalauga oloo talanoa ai tagata i luga o fesootaiga ale OLP poo OlePalemia. Ole facebook oloo tele ina fesootai iai OLP ma iloa tele ai ia manatu ma lagona faaalia ma e leai se isi o tagata faigaluega ale Malo faapea ta’ita’i ole Malo i Minisita ole Kapeneta e lē o faitau ai.  Oloo talosia e le toatele oloo faaaogāina fesootaiga televavave e fesootai ai ma aiga i fafo aemaise ole faasalalau ai o pisinisi, ia le taunuu le Palemia ma le Malo ise faaiuga e titina ai le facebook ma isi auala o fesootaiga faaonapo nei. Ua faaalia e Tuilaepa ole ogaoga o tuua’iga sese oloo salalau i fesootaiga televavave ua ta’ita’iseseina ai ma tagata ae lē oni tuua’iga e moni.

Ole mataupu ile lesitalaina o fanua faaleaganuu oloo mafua ai nisi o faitioga ma tuua’iga peitai ua faamanino e le Palemia ma le Malo, e lē o mafai ona mamulu ese le pulea o fanua faaleaganuu mai aao o suli ma feoi o suafa matai oloo pulea eleele tau Samoa.