E lasi le vaaiga na molimauina i le Maota o faatasiga i Malaeola, i le afiafi o le Aso Toonai talu ai, i le matagofie felanulanuai e lē gata i teuga a le aofia, ae o i latou uma sa faatinoina vaega, auā le faalauiloaina o le DVD lona 2, a le ausiva a tamaitai lalelei, o Le La o Samoa.
Na atili ona maualuga lea afiafi i le faatasi atu o nisi o tupu ma e‘e o le atunuu sa auai atu e patipatia ma molimauina le matagofie o faafiafiaga a le ausiva, o susuga i taitailotu, o faauluuluga o pisinisi faapea foi nisi o tamafanau a Samoa sa lagolago atu e ala foi ia latou faafiafiaga o siva ma pese.
O se avanoa lelei foi na feiloai atu ai i le tamaitai lalelei ua pale nei i le tofi o le Tausala Samoa o Niu Sila, Metotisi Komiti-Faalavaau, ma nisi o tamaitai sa tauavea lenei pale i tausaga ua mavae.
O le afiafi lava lea na faatau ai i se tau pa‘ū $20 le DVD fou ua tatalaina nei a Le La o Samoa, ae $30 le tau masani o le a faatauina atu ai i nofoaga ua faatulaga, le faleaiga o le My Samoa i Kelston a le susuga Tavai Meni, ma le kamupani lafo tupe o le Pacific Ezy Money Transfer.
I se faatalanoaga ma le tamaitai pule o le ausiva, Sia Su‘a, na ia faaleo ai lona agaga maulalo i le faagaeetia ona o le maualuga o le lagolagosua a le atunuu i lo latou faamoemoe, na mautinoa lena i le tumutumu atu i lea afiafi.
Ua avea ai foi lenei avanoa e momoli atu ai le faafetai tele a le tamaitai pule, Sia Su‘a ma lana ausiva, i le mamalu uma o Samoa sa auai atu i lea afiafi.
Sa ia ta‘ua ma faailoa faapitoa le auai atu o le afioga i le alii faipule, Su‘a William Sio ma le faletua, le afioga i le Konesula Aoao o Samoa, Faolotoi Reupena Pogi, le paia i ao o faalupega, o faauluuluga o pisinisi uma ma kamupani sa lagolagosua, o aufaafiafia eseese sa auai atu, i vaega ma tagata taitoatasi.
E lei galo foi i lana faafetai i latou uma lava sa faia vaega eseese, e peiseai e itiiti i le vaai, ae o le mea moni, ua mafai ona atoatoa ma matagofie lenei faamoemoe, ona o vaega uma sa latou faatino.
Sa ia manatua foi nai ona aiga i Niu Sila nei ma Samoa, o uo ma ē masani, sa molimoli mai upu faamalosi ma faalototele i le taimi atoa sa faagasolo ai lenei taumafaiga, o si ana fanau, aemaise foi nai tamaitai uma lava o loo sisiva i le ausiva.
Saunoa Sia, ‘o nei lava mea uma ou te faia, e faafiafia ai i tatou uma, ae o le viiga lava e faafoi ai i le Atua.’
