Sikoa Tuivasa Sheck ae sefe e SBW le Roosters

Ua tulai mai nei le Roosters ma le Rapiti i le tulaga muamua tutusa e ta‘i 40 ‘ai aofai ae toe o se aga maua ‘au e lua e sailia le siamupini o le 2013.
Na o le 4-0 na manumalo  ai le Roosters i le Manly Sea Eagles mai se sikoa mataina a le alo o Samoa ia Roger Tuivasa Sheck, lea na ia tuliloaina atu se kiki i le tulimanu a James Maloney ma faapa‘ū atu ai i le polo. E lei ova le kiki ma tumau ai ‘ai i le 4-0 a Manly lea e uma lava le taimi o osofai le Rapiti.
I nisi o taimi e faatolu na aapa atu Sonny Bill Williams e fesoasoani e taofi le faapalalasi atu o Manly i le laina sikoa ma semanu e manumalo ai aepeitai o le finau o le Roosters na iloga ai le mataina o lana puipuiga.
Ua maua nei le vaiaso e tasi e fai ai le malologa a le Roosters aepeitai o Souths lea laa toe taaalo ma Cronulla Sharks i le vaiaso nei. I se vaiaso na vaaia ai le manumalo mataina a le Rapiti i le Melbourne Storms sa ono iai foi le avanoa o Souths ae laki o le sikoa a Tuivasa ma le puipuiga a SBW ma tama o Bondi Junction.
I isi taaloga na manumalo mataina le Rapiti ia Storms 20-10. Cronulla 20-18 Cowboys ma le Bulldogs…..Knights. O le po o le Aso Tofi na maimoa ai foi Ausetalia i se faatalatalanoaga a le alo o Samoa ia SBW ma Gus Gould o le Polokalame TV o le Footy Show.
O se taimi muamua lenei ua tatala ai le soifuaga i aso taitasi o Sonny i mea pueata ma le autusitala a o loma sailiga siamupini. Na suia ai foi ma manatu o latou e lagolagoina le Bulldogs sa gugulu lava talu na alu ese SBW i le 2008.
I lea faatalanoaga a le Footy Show i luga o le alaata 9 ma Gus Gould na talanoa ai Sonny i le tāua o lona aiga ma ana koleniga i lenei vaitau e tausi ai lona tino. Sa pue foi lenei polokalame mo le taimi muamua i lo latou fale i Sini a o faatasi ma lona tamā le susuga ia John Williams, lona uso ia Arthur Williams ma lo la tuafafine.
Sa faaalia e Sonny a fai e ritaea mai i le taaloga, pau lava lona faanaunautaiga ia soifua fiafia ma faatasi ma lona aiga. Afai foi e fai sona aiga ma se fanau e maualuga ia te ia le tausi ma aoai lelei o le fanau ia soifua ane ma avea ma ni tamaiti lelei.
Sa faato‘ā faailoa ai foi ma se faalapotopotoga o fanau e lē atoatoa le malosi ma le mafaufau i Sini o loo lagolagoina ma fesoasoani ai SBW talu mai le sefulu tausaga talu ai. “Oute lē manao e faalauiloa faalauaitele la matou mafutaga mafanafana ma le fanau nei leaga e lē maua ai le auga tonu o le faamoemoe o le foai ma agalelei ia i latou nei.”
O nisi o fanau e amata mai i le lima tausaga na soifua mai faato‘ā aafia i maitaga o le tino ma le mafaufau na faaalia lo latou alolofa ma fiafia tele ia SBW….leitoa manuia lenei alo iloga o le atunuu.