O le lami maoae a le Queensland Cowboys 64-6 a le west Tigers i Cairns na taulamua ai alo o le atunuu o ni sui foi o le Toa Samoa ia Matthew Wright faapea Antonio Winterstein. O le isi foi alo o Samoa i le ‘au lenei a le Cowboys ia Tautau Moga i le tulaga o le uigi na maua foi ana sikoa e lua.
Ae peitai o le sefululima minute amata o le taaloga na laasia faatolu ai e Mathew Wright le laina sikoa a le Tigers i se vaaiga mataina a o faafoeina e le alii iloga ia Jonathan Thurston la latou laina i tua. Na matua leai se tali mai a Wests i lenei osofaiga malosi ma atili mafatia ai i se vaiaso na talanoaina ai pea le vevesi i le va o le kapeteni ia Robbie Farrah ma le faiaoga a le Tiger o Mick Potter lea ua faatea.
O le isi alo iloga o Samoa i le ‘au lava a le kaupoe o le isi uigi ia Antonio Winterstein lea foi na sosoo ana sikoa e lua i le minute 39 faapea le ‘afa mulimuli. E pei ona silafia o Antonio se tasi alo iloga o le Toa Samoa i le Ipu o le lalolagi talu ai lea foi na sikoa mataina i le taaloga a le Toa ma le Kiwi.
O le alii ia Matthew Wright na taalo fulupeki mo Samoa i le taaloga ma Toga i le 2013 lea na malolo ai le Toa ae o le toe siitia o lana taalo ua iai nei e ono toe fili ai mo le tauvaga ma Niu Sila, Ausetalia ma Egelani lea ua folifoli atu i ai le ‘au a le atunuu i le faaiuga o Oketopa ma Novema.
O nai isi tama Samoa na mataina ai taaalo i le taamilosaga 22 e aofia ai Daniel Vidot e lua sikoa mo le Broncos manumalo ia Bulldogs. Na mataina foi le sikoa a Chanel Matautia o le Newcastle Knights lea na manumalo mataina i le Storms.
Ua tuua foi e Kris Inu le Bulldogs ma le Liki ina ia taalo lakapi Iuni mo Farani ae peitai ua taliu mai nei Iosia Soliola mai Peretania e taalo mo le Canberra Raiders lea ua faiaoga lagolago ai Matt Parish o le Toa Samoa.
