E matautia le sikoa na manumalo ai le Broncos 47-12 a le Lapiti le siamupini o le 2014 i le la taaloga i le vaiaso talu ai. E lei avea le manu‘aga o le alii iloga ia Greg Inglis ma alofaga a lana ‘au lea sa matuā faamo‘amo‘a e Milford ma le ‘au mai Brisbane.
O lenei taaloga o le taamilosaga 25 na faia i Sini nei ma ua sese ai le upu na vivini le moa fanua. E faalua na sikoa Milford i ni gaioiga mataina e pei ua toe vaaia ai lana sikoa mo le Toa Samoa i le Ipu o le lalolagi i le 2013.
O le tausaga lea na amata tosina ai kalapu Ausetalia mo lenei alo o Samoa a o taalo mo Canberra lea na se‘i atu ai loa e Brisbane ma faatasi ai ma Wayne Bennett le faiaoga iloga lea ua atinaeina Milford i se numera 6 e ono tulai mai i se taimi o i luma e faapei o Darren Lockyer.
O le sikoa lona lua a Milford na atagia ai le agavaa i soo se itu o le malae o lana taalo ma atili see ai i luma o latou ‘ai. E faaono lava na sao atu mai pue a le Lapiti ma faasoa atu le polo i lana ‘au.
O isi alii iloga o le Broncos i lea taaloga o le alii ia Ben Hunt na sikoa faatolu aemaise le uigi ia Corey Oates e tasi lana sikoa. O le sikoa lenei a Corey Oates na semanu faapalasi le Rabbitohs i le laina sikoa ae toe fao mai lava e Oates le polo i luma o le laina 22 ma momo‘e mai ai pe tusa ma le ivasefulu mita ma sikoa ai.
O se manumalo mataina 47-12 ma ua mautinoa ai le ono sao o le Broncos i le valu pito i luga e tauva mo se isi siamupini e faaopoopo i mau fusi a le Broncos na manumalo ai o faiaoga mai Wayne Bennett.
