Ua saunoa le faafeagaiga o le Ekalesia EFKS a Peteleema fou le susuga Iosefa Afutiti, o laau suisui ua foai atu e le ofisa o le Hai Komesina o Ausetalia i Samoa, o le a siitia ai le tomai o tina o le mafutaga a lana ekalesia auā o le a lē toe faaaogā ai laau suisui vili lima, ae o laau e alu i le eletise.
O ni laau suisui foi e tele isi ituaiga o metotia e mafai ona maua ai mo le suiina o se laei. O laau e sefulu e tusa lo latou tau aofai ma le $8,900 tala na auala atu mo tina o le ekalesia ona o se talosaga na ave i ai. O fesoasoani tuusa‘o a le ofisa o le Hai Komesina e i lalo ifo o le sefulu afe ua avanoa ai le fesoasoani ua maua e tina o Peteleema fou.
O le ekalesia lenei o loo i Vaitele fou ma e toatele aiga ua faatau fanua i lea vaega o le lio o le taulaga o Apia ua auai, ma o se fiafiaga lea i le faafeagaiga ma lona faletua ona o Vaitele fou o se pitonuu e tele ina faigaluega tagata aemaise o le ituvai o tina ma tamaitai. O le itu mautinoa o le a fesoasoani laau suisui mo le saunia o laei ma isi vaega e manaomia ai lea ituaiga o masini, ma faasao ai seleni mai le tau ave i se tagata suisui.
O le isi lelei o le a aoaoina ai tina e lei maua lea silafia ma fesoasoani ai i o latou aiga.
O le faiva lea o tina sa tele ina faatino i aso ua mavae, o le laau suisui ae a toe vaaia i tua i na tausaga o laau vililima lava sa faaaogā, sosoo mai ai ma laau sosoli, ae o lea ua tele suiga o le soifuaga, ua aumai nei laau suisui e alu i le eletise ua sili ona faigofie ma vave.
O le Aso Toonai na tea nei na amata ai ona faaaogā laau suisui ma sa vaaia le sagisagi atu o tina o le mafutaga e fia maua se avanoa e tago ai i le laau fou o le singer, auā e lē au maua ni foai faapea aemaise o le ituaiga laau suisui sili ona lelei ma anagata, ae o lea ua leai se suegatupe e faatau ai, ae o laau ua maua i le agalelei o le ofisa o Ausetalia.
Ua tele nisi mafutaga a tina o nisi o ekalesia i le atunuu ua latou maua foi lea fesoasoani a Ausetalia ma o le molimau a nisi o tina o ia ekalesia, ua telē se suiga o lo latou lotoifale i le saunia o ofu o le fanau ma laei o le aiga ina ua maua lea fesoasoani tāua.
