Siitia tapenaga o taumafa Teuila ma le fono o le SIDS

O le saunia o mea taumafa o se isi lea vaega tāua tele i le latalata atu i le taligamalo a Samoa e lē gata o le vaiaso e lua o le Teuila ma le vaiaso o le fono tele a atunuu laiti tau atia‘e o le lalolagi. O le mafuaaga lea o le faia i le eleele fou o tapenaga mo le saunia lelei o mea taumafa, ma faailoa ai foi nisi o taumafa a le atunuu.
O le autu e pei ona faaalia e le Palemia sa auai ma nisi o minisita o lana kapeneta i le tofoina o taumafa eseese, ia mafai ona maua lea avanoa e faalauiloa ai a tatou lava mea taumafa o loo maua ma gaosia i lo tatou atunuu ae ia alu atu ai ma le tala ave o meaai e maua i Samoa ina ia silafia ai e tagata o isi atunuu e silisili foi ona lelei saunia a tatou mea taumafa.

O le vaiaso nei i le Aso Faraile o le a toe faia ai foi lea faamoemoe o le tapena uma atu i le eleele fou i tua ane o le maota Samoa o le pulega o tagata tafafao, o vaega uma e gasese ai taumafa a pisinisi ma tagata taitoatasi o le a latou faia le faiva o le saunia o mea taumafa ma faatau atu i le lalolagi o le a asiasi mai i Samoa i le taimi o le Teuila ma le fono a malo laiti o le lalolagi.

Na faamatala se tasi o tina sa faailoa ai i le Aso Faraile na tea nei ana taumafaiga, e maeu le avanoa ua latou maua, auā e le gata o le a maua ai se seleni lelei, ae o le a faaiila ai ma le tomai o le silafia gaosi meataumafa faasamoa, e pei o le fa‘ausi, taufolo, vaisu poo le tunui‘a, suamoa poo le moa samoa tunupa‘u ma isi lava a tatou taumafa ua seāseā faatāua ae ua faatāua le kukaina ma le saunia o meaai a isi atunuu.

O isi taumafa ua faamalosia le saunia ia lelei o a tatou supoesi ma le kokoesi, vaisalo, suafa‘i, ma isi meaai masani o le malu o le taeao. O suiga o le a vaaia i meaai o le a tosina ai foi ma le toatele o o tatou lava tagata e faaaogā mea o loo maua i lo tatou lava siosiomaga mai faatoaga, o le sami ma le vaomatua e gaosi ai a tatou meaai nai lo le faalagolago tele i mea mai fafo a papalagi.

O le sini autu foi o le faamoemoe lenei ia lelei ona saunia taumafa, auā o le tasi lea vaega tāua o le soifua maloloina ia tausia le tumamā i taimi e gasese ai meaai eseese. Sa vaaia i le Aso Faraile na tea nei le fiafia o le auvalaaulia na tofoina meaai ona o le lelei tapena o i latou sa nafa ma le gasesega, ae o le luitau mo i latou, ia tausia ai pea lea lelei, ae lē o le tau ina tumamā i le taimi e o mai ai malo ma tagata mai fafo, ae uma loa toe foi i le mea e tasi o le faainaelo ma le lē tausia mamā o le saunia o meaai.
O nisi o le au faapisinisi e saunia meataumafa a o faailoa nisi o a latou gasesega auā le atunuu ma malo mai fafo o le a auai i le Teuila ma le fono a malo laiti tauatia‘e le SIDS conference e faia i le masina fou o Setema 2014