A o alualu pea i luma le tele o le tomai fai ata tifaga o nisi o tamalii o le atunuu o Samoa, ae ua iai foi fanau talavou, ua lē fia nofonofo ae ua naunau foi e uia lea lava ala e tasi.
O loo tau faama‘ea mei ona pueina ma tuufaatasia se isi foi ata tifaga i le gagana Samoa, ua faaigoaina, Liliu le Taimi. Sa faailoa muamua i se taimi e lei mamao tele atu i nisi o tusitusiga lenei lava ata, ae ona o nisi o tuatuagia lē maalofia na tau tuai teisi ai le faamae‘aina o lenei ata tifaga Samoa.
O Jordan Kwan, o se alii talavou na soifua a‘e lava ma aoga i Samoa, ae na agai mai i Niu Sila i le 18 o ona tausaga, e faaauau atili ana aoga i le Iunivesite o Aukilani, ma amata ai lava ona faataitai le tele o lona atamai i nei lava tomai o le pueata (photographer) ma le pueina o ata tifaga (film maker).
O se alii talavou e filifiligā ina tino mai ni taleni ua ia a‘oa‘oina. Ma o lona tusia ai ma tuufaatasia lenei ata tifaga, e iai lona faanaunautaiga o Jordan, ia atili lalaga ai foi le naunau o isi alo talavou o Samoa, e faaali a latou taleni o loo natia, ae ua oo mai le taimi ua tatau ai ona faalauiloa ma faaaogā.
E iai le talitonuga o Jordan o lenei ata tifaga o loo momoli atu ai se feau i mea e sili ona faatāua e tagata Samoa, e pei o le ‘Alofa’, le ‘Ekalesia’ ma lagona ‘Lototoa’ o le a faamalosia ai le tagata e tulai ma tetee atu pe a fetaiai ma puapuaga ma fita o lenei olaga.
O se ata e faatulaga mai se tala i se mafutaga o le alofa fetosinaai i le va o se alii ma se tamaitai Samoa, ma le tele o faafitauli na fetaiaia, o mea o loo fesagaia i aso taitasi ma o tatou tagata i lenei vaitaimi.
Na sau Jordan i Niu Sila ma taumafai lana aoga ma saili sana galuega faavaitaimi lea na iu ina galue e kiligi i se tasi o Westfield, tau ina ia maua ai se tupe e tausia ai manaoga o aso taitasi, a o ia finau pea ina ia tino mai ana moemitiga e pei ona iai le ata o loo tau faamae‘a nei.
O le moemitiga a Jordan ia mafai e o tatou lava tagata Samoa, ona pueina ata i le gagana Samoa, e faamalieina ai le manaoga maimoa a tagata Samoa, ae i se tulaga faapolofesa e pei ona iai ata tifaga a papalagi. O le faatalosaga a lenei alo o le atunuu ma nisi o ana uo o loo latou galulue faatasi i le faamae‘aina o lenei ata tifaga, le alii o Darren ma le tamaitai o Sherryl, o loo moomia se seleni e tau faamae‘a ai le tuufaatasi
a o le ata tifaga ma tatala mai i tua. E $10,000 le seleni o loo taumafai nei alo o Samoa e sailia, ma ua tuu mai le filifiliga i soo se aofaiga e mafai ona fesoasoani atu ai i le latou galuega. Ua soosoo tau‘au atu i ai le kamupani telefoni o le Spark, e latou te faaluaina soo se tupe e foai ai tagata taitoatasi.
O le website: http://sparkmypotential.co.nz/project e mafai ona saili i ai ma fai ai le foai mo lenei vaega, ma ua latou faailoa mai foi, soo se tasi e foaiina se tino i tupe e $100 pe sili atu, ona maua ai le avanoa e muai maimoa ai i lenei ata tifaga a o lei tatala aloaia maia i tua i le lautele.
O le a latou muai lafo mai se kopi o le ata mo lau maimoa, pe afai e $100 pe sili atu lau foai e faia.
