Talu mai le faigamalo a le soofaatasi na taitaia e Tony Abbott ma ua sui tulaga i ai le Palemia fou o Malcolm Turnbull, e lē o vaaia se faaitiitia ae o loo tumau pea totogi o pili e aotauina ai le fanau ma tagata matutua i faailoga maualuluga i Iunivesite tetele a le Setete ma le atunuu.
Ua avea foi lenei itu ma tulaga ua aafia ai nisi o le toatele o tagatanuu faatoa taunuu mai i Ausetalia e lei mautu ni galuega faapea le lua tausaga faatulafono e alala ai i Ausetalia faatoa mafai ona totogi ai foi pepa nofomau taugata ua iai i lenei vaitau.
O le toatele o tagata ua ulufale ma o loo fia ulufale i le tele o Iunivesite i Sini lava ia o se atugaluga tele lenei.
E le gata i lea o lenei vaitau i le utiuti o nisi o galuega i falegaosi oloa e lē manaomia ai ni agavaa faapitoa e fesoasoani i nisi o loo aooga ma galue ua tele ina mou ai foi lenei auala fesoasoani.
Mo nai o tatou tagata o loo gasolo mai Niu Sila e faamautu i Sini ma Ausetalia nei, e tele se aafiaga. Na o nai tagata e iai Visa faapitoa (SCV) poo Special Category Visa e ono fesoasoani i ai nonoga tupe mo mataupu ma faailoga i Iunivesite ae toe totogi pe a faigaluega (HECS).
Mo alo ma fanau a Samoa ma le Pasefika na fananau ma soifua i totonu o Ausetalia nei o se avanoa lea e tuliloa ai a latou miti mo se lumanai manuia ma fesoasoani ai i nai mātua ma aiga sa lagolagoina ma tausia mai o latou soifua.
I se sailiga ma faamatalaga ua mautinoa ai o fanau nei ma suli o aiga e masani i tiute ma matafaioi i aiga ma ekalesia e maualuga lo latou tausinio ma faauuina i tikeri ma faailoga maualuga mai Iunivesite.
O nisi foi o fanau ma tamalii o le atunuu mai Samoa e masii mai i sikolasipi ma avanoa e auala mai i falefaigaluega e matauina lava le sapaia ma faataunuuina ma le manuia a latou aoga faaiunivesite.
E talitonu le toatele, o le agaga tausinio ma le sailimalo o i latou nei auā le tapuaiga mai a aiga i Samoa aemaise ai le taugata tele o nei avanoa e pei ona faaalia e amata atu i le $50,000 Ausetalia se tikeri lea a faaliliu i tupe Samoa e silia ma le $100,000 tālā.
