Ua faaalia e le kamupani vaalele o le Ea Niu Sila o le a sui lana vaalele e faaaogā i le vaiaso o le taaloga faitaulia i le va o le All Blacks a Niu Sila ma le au a le atunuu le Manu Samoa.
O le faamatalaga a le Pule o Maketi ma fefaatauaiga a lea kamupani o Cam Wells ua matuā toatele lava tagatānuu o Niu Sila o lea ua faamautu o latou avanoa i le kamupani vaalele ona o le fia malaga mai e maimoaina lea taaloga.
Ua faamautu mai ai nei la le sui o le vaalele a le kamupani e fealuai i lea vaitaimi ina ia mafai ai ona tali i le toatele o pasese e feaveai i le va o Niu Sila ma Samoa i lea vaitaimi.
O le taimi lenei o loo fealuai ituaiga vaalele o le Airbus A320 i le va o Samoa ma Niu Sila ae mai i le aso 7 o Iulai i le tausaga fou e oo i le aso 11 o Iulai lava, o le vaalele o le ituaiga o le Boeing 7-200ER lea o le a feaveaia pasese mo le taaloga lea ua faamautu le faia i le Apia Park i le aso 8 o Iulai o le tausaga fou.
O lea foi e tālia lava seia oo atu i le tausaga fou pe o le a faafia ona malaga le ituaiga vaalele lea i totonu o ia aso, ona o le a fuafua lava i le toatele o le a moomia lea auaunaga i lea vaiaso.
O le Kamupani vaalele lenei a Niu Sila ua talia nei foi e le Iuni Lakapi a Samoa, lana fesoasoani e pei ona faaataata mai, na te aumai fua ai le aulakapi a le All Blacks mo lenei taaloga. Faaalia e le Sui Taitaifono o le Iuni Lakapi a Samoa, Lefau Harry Schuster, ua taatia le ofo a le Kamupani vaalele ae e lē o maioio lelei mai poo le ofo e totogi atoa pasese pe afaafa ai ma le Iuni a Samoa nei auā o Samoa lea e talimalo o Samoa e tatau ona totogi le agai uma mai o lenei faalapotopotoga.
O le faaopoopoga i le taimi lenei o le numera o i latou ua faamautu avanoa e agai mai ai mo le taaloga e silia i le to‘a 300 ma o le eseesega o le pasese e mafai ona aumai e le Airbus 320 lea e fealuai i le va o atunuu e lua i le taimi lenei ma le vaalele lea o le 77-200ER lea o le a faaaogā i le taimi o lea taaloga faitaulia, o lea e faaopoopo nofoa e 311.
E lē o laitiiti foi le pasese o i latou o le a malaga mai mo lea taaloga, o lea ua ofo e le Ea Niu Sila le pasese e $489 (tala Niu Sila) mo le sau i Samoa ae lē taulia ai le toe foi atu i Niu Sila mo avanoa ua faapea ona faamautu nei ae o lea e faaalia e le kamupani vaalele e lē o faaitiitia le numera o tagata o Niu Sila ua faamautu o latou nofoa i femalagaaiga nei ae o lea e lei oo atu i le tausaga fou.
E foliga mai e agai atu tagata i Samoa nei mo ni avanoa i le Apia Park ua tumu uma i le au matamata asiasi mai a Niu Sila.
