O le faigapalota tele o loo loma nei i le masina o Mati ua siitia ai le numela o falepalota o le a faaaogāina. E silia i le 358 falepalota i Upolu ma Savaii pe a faatusa i le na o le 290 na iai i le faigapalota tele na faia i le tausaga e 2011 le faigapalota tele mulimuli lea a le atunuu.
I se feiloaiga ma le sui Komesina o faigapalota le tofa Faimalomatumua Mathew Lemisio na ia faaalia ai, o atugaluga ma faitioga sa aliali mai i faiga filifiliga ua mavae i le tapunia o falepalota ae toatele tagata o loo tutū i laina e lei faia a latou palota, o le mafuaaga lea o le siitia o le numera o falepalota.
O loo fuafua le faaopoopo o falepalota i le aofaiga toatele o tagata palota i se itumalo. Ua faailoa mai foi e le sui komesina, o le taunuuga o lea faiga filifiliga o le a mafai ona maua i luga o fesootaiga faatekonolosi i le initaneti, faapea auala masani o fesootaiga i leitio ma televise.
O le mae‘a ona tuufaatasia o lola palota uma ua tulai mai ai e selau sefululima afe, fituselau fāsefulutasi (115,741) le aofaiga o tagata palota ua lesitalaina mo le faigapalota ia Mati. E lē itiiti ifo ma le 15 afe tagata palota fou ua faaopoopo pe a faatusa i le aofaiga o tagata palota i le faigapalota tele i le 2011.
I le toe vaavaai i faamaumauga o le palota tele ia Mati o le tausaga e 2011 ua faamauina ai e to‘a 159 sui faatutū na tauva, e aofia ai le 79 o sui na tauva mo le HRPP, to‘a 41 na tauva mo le Tautua Samoa, ae to‘a 39 na tauva o ni sui tutoatasi. E to‘a 28 na manumalo i lalo o le fu‘a a le HRPP, ae to‘a 13 na manumalo i lalo o le fu‘a a le Tautua Samoa. E toavalu sui tutoatasi na manumalo lea na lagolago uma i le HRPP.
O le aso 29 o le masina nei o Ianuari e faata‘ape ai le Palemene. O lona uiga ua toe lua vaiaso atoatoa ma aso e lima o loo totoe ona faamuta aloaia lea o tofi faipule o sui o itumalo i le paeaiga a le Palemene o loo iai nei.
