Siitia maualuga le Tama Tane Malosi i lenei tausaga

Tamā ma tama talavou sa auai i le valaau ina ua mae‘a le upu folafola a le Atua
Tamā ma tama talavou sa auai i le valaau ina ua mae‘a le upu folafola a le Atua

Ua lima nei o tausaga talu ona faagasolo le polokalame o le Tama Tane Malosi i Aukilani, e siitia maualuga ai pea le tulaga o le avea o le tama poo le tamā ma Tama Tane Malosi. Ae o le tala fiafia o loo tauave pea i tausaga taitasi seia oo mai i le polokalame o lenei tausaga, o le faasooina lea o tama tane ile talalelei o loo momoli atu e nisi o tamā sa auai i polokalame i tausaga ua tuanai, lea la ua oo mai ile Tama Tane Malosi o le 2016, ua maitauina ai nisi o sui fou ua mafai ona tofo ile lololo ma le suamalie o le upu a le Atua e pei ona mānavaina e ana auauna filifilia.

O le afiafi o le Aso Faraile na toe tatala aloaia ai le polokalame o le Tama Tane Malosi i le Manukau City Baptist Church i le 9 Lambie Drive i Manukau, lea sa toatele tamā ma tama talavou aemaise o susuga i faafeagaiga sa auai e molimauina le matagofie o upu folafola mai le afioga Paia a le Atua.

O pesepesega mālie mai le aufaipese o le Livingstone Evangelism Ministry o se tasi lea o feau momoli sa o faatasi ma le upu faauuina a le Atua i le po o le Aso Faraile ma le Aso Toonai.

Pesepesega a le Livingstone Evangelism Ministry
Pesepesega a le Livingstone Evangelism Ministry

O le susuga ile faafeagaiga ia Tuilagi Meke ma Pastor Freedom Aiga sa fai ma fofoga o le polokalame, ona tulai lea o le susuga ile faafeagaiga ia Pastor Iliafi Esera e folafolaina le upu a le Atua i le uluai aso, lea sa ia faamalosi ai i tama tane, “A lē suia lou mafaufau e lē mafai ona e tea ma vaivaiga ma mea o loo saisaitia ai oe, ma ia tuuina atu lou tino ile Atua o le taulaga e Paia ma Mālie i ona luma e lē mafai foi ona fesuia‘iina lou mafaufau pe a lē tuuina lou tino ile Atua.” Sa maua foi le avanoa i lea afiafi e tatala ai le avanoa i tamā e fia manaomia se tatalo e faamalosia ai o ia e avea ma Tama Tane Malosi. O le taeao o le Aso Toonai na toe ala usu ai le toatele o tamā ma tama talavou e tulituli le sosooina o le polokalame ona o le fia fai manuia ile tele o faamanuiaga na sasaa mai e ala ile upu folafola. Na amata i pesepesega a le aufaipese ua filifilia, ona toe saunoa lea o le susuga ile faafeagaiga ia Pastor Iliafi Esera e sosoo le mataupu o le Tama Tane Malosi.

Aufaipese a tama tuai o le Tiamaa
Aufaipese a tama tuai o le Tiamaa

Na maua foi le avanoa e faasoa mai ai le susuga ia Eroni Clarke, ae lē gata i lea o le taimi muamua lea ua maua ai se sao o le susuga ia Ulu Aiono lea sa ia fafagu ai i Tama Tane, e aua le fefe e fai se mea fou, ia alualu i luma lou olaga ma ia fai se suiga fou, auā ua fetaui lelei ma le autu filifilia o le polokalame ua faaigoaina o le “Laasia”, auā e iai taimi e alualu ai le olaga ua tau feto‘i le savaliga, ona tau maua ai lea o le faavaivai.

Ina ia aua le toe foi ae ia alu pea ma faamalosi. O le alii fusu lauiloa, le susuga ia David Tua o lona taimi muamua foi lea, na ia momoli mai lana anavatau, ‘ia maua e tatou le loto faamagalo, auā e lē o po se lilo i le mea sa tulai mai a o iai i ana taaloga, ae o lona loto faamagalo ua toe fausia ma laasia ai se isi laasaga fou o ana galuega.’

O se tasi laasaga fou sa iai le polokalame o lenei tausaga ua mafai ona ofi atu ai tama tuai o le Tiamaa e fai so latou sao auā le tapu‘eina pea o le soifua galue o tama tane ina ia avea ma Tama Tane Malosi, faatasi ai ma nisi o sui tuai sa folafolaina le upu a le Atua e pei o le susuga ile faafeagaiga ia Kuki Aloalii, Nick Tuitasi ma le susuga ile faafeagaiga ia Faatuatua Sauafea Pulepule.

O se faamoemoe o loo maitauina ai pea le galala o tama tane i le upu a le Atua ae ua saunia e le Tama Tane Malosi lea laolao lelei e mafuta ai tama tane uma mai aiga taitasi e feofoofotai ai i le alofa o Iesu. O lea ua faaiuina le polokalame o lenei tausaga, ae ua iai le naunautaiga mo le isi polokalame ile tausaga fou pe a tusa ai ile alofa ma le agalelei o le Atua e toe feiloai ai.