I le maea ai o le taamilosaga o le Taitoafitu i le tausaga ua mavae i le lē lelei o le Au a Samoa, na lē nofoai ai le Iuni Lakapi ae vave faia se galuega e toe saili lelei ai le tofa mamao ma le faautautaga loloto e tapena lelei ai le ‘Au a Samoa mo le taamilosaga o le tausaga nei, aemaise ai lava le naunau e toe faafoi Samoa i le lakapi sa masani ai i tausaga ua mavae atu.
O Samoa o se tasi lea o atunuu e tatau ona tumau i le pito i luga i ‘Au poo tama matutua o le taaloga, ae na alu alu lava taamilosaga ae vaaia ai loa le tulaga faaletonu o le ‘Au ua tatau ona faia vave loa i ai se faatatau.
Tusa ai la ma nisi o taiala fou e mulimulitai ai i lenei tausaga o le vave tofiaina ai lea o le faiaogaulu mo le ‘Au i lenei tausaga ma le faatuatuaga e mafaia lea ona toe fafagu mai le lakapi a Samoa O loo iai le naunautaiga i lenei tausaga ina ia lelei le tulaga o le a iai le Manu Samoa i lenei tausaga. O loo tulimataia le tulaga 4 pe a talafeagai ai ma le finau i le taamilosaga o le 2015 agai atu i le 2016. E ui lava na lē taunuu le faamoemoe i le sailiga lata mai nei mo se avanoa i le Olympic ae o loo faamoemoe pea le Iuni Lakapi a Samoa mo le isi avanoa ia Iuni i le tausaga fou pe a aulia atu i ai ma le manuia, o loo telē le avanoa e ono sao atu ai Samoa i taaloga o le Olympics pe a faamaoni ma taumafai ina ia ausia lea vaega mo le faaleleia lava o le lakapi mo le agaigai pea i luma.
O le ‘Au i le taimi nei, e talitonu o le ‘Au lelei lea ua mafai ona filiina mai i le taimi nei latou te faaeaina Samoa i lenei taaloga i se taimi o i luma, faatasi ai ma le alii faiaoga fou, tuu atu i ai ma le lagolagosua a Muliagatele Brian Lima, e lē toe taumateina le lelei atoatoa o le ‘Au a Samoa.
Vaai i le suiga ua iai nei i lalo o le pulega fou ua vaaia nei le ‘Au atoa ai ma le faasavaliina ai o le polokalame fou lea o loo galulue vaavaalua ai ma le pulega ina ia siitia le tulaga i le fitness level e finau ai ma ‘Au tetele, o loo toatele e iai le talitonuga o le tausaga nei ua iai le suiga.
E faamoemoe e faaauau ai pea lea suiga lelei seia oo lava ina matuā masani alii taaalo i le faatinoina o le taaloga i auala e manumalo ai. O le isi malosiaga tele o le ‘Au i le taamilosaga lenei o le iai o le luitau ina ia siitia le tulaga maualalo o loo iai Samoa i le taimi nei, i se tulaga e toe faaeaina ai le Lakapi a Samoa ua ta‘uta‘ua ai Samoa i atunuu i fafo, atoa ai ma le filifilia o le pulega fou lea ua iai nei le fitu a Samoa.
O le ‘Au foi latou o ni alii taaalo ua talafeagai lelei lo latou filifiliaina auā o ni tagata saili malo foi. Se‘i tatou tapuaia le vae lona lua o lenei taamilosaga atonu o le a faamausaliina ai atili Samoa o se ‘Au ua matua i le taaloga, o se tama matua foi i talafaasolopito i tausaga e tele. Talosia faiva ina ia a‘e ma le fiafia.
