O le taugata o le totogi o fale ma nofoaga e faia ai pisinisi o le mafuaaga lea o le siitia o se tasi o auaunaga a se tamalii Samoa i Sini ma lona aiga poo le TIMMS Island Shop sa faia i Queen Street i St. Mary’s.
O se faleoloa iloga na tatalaina i le tausaga 2011 ma e faafoeina lava e le tamalii ia Gasu Tearoa Iosefa ma lona faletua ia Fale.
Saunoa Gasu Tearoa Iosefa, talu ona amata mai i le nofoaga muamua le pisinisi na vaaia lava le siitia maualuga o le mautotogi ma sa talosagaina le pulega o lenei fale o iai ma nisi pisinisi eseese i se maliliega talafeagai. Ae peitai sa lē manuia le talosaga ma tonu ai loa le pulega a le TIMMS e sailia se isi nofoaga e taugofie.
O le taimi nei ua toe tatalaina i le nofoaga fou i le tuatusi o le 23 Parklawn Place i North St Mary’s lava lenei tautua pe tusa ma le lima minute mai le nofoaga tuai ae peitai ua taugofie ma telē se faamāmā avega ua iai.
O lea foi ua amata ai ma auaunaga masani i taumafa ma oka i aso fanau ma aso faapitoa. E lē gata i lea a o tupe lafo, laei eseese faapea nusipepa e pei o le Samoa Times lea e alumia tele i lenei pitonuu o St Mary’s.
O le tele foi o Ekalesia Samoa i lea pitonuu e lagolagoina lenei tautua aemaise o taumafa e gasese lava e le aufaigaluega Samoa ma silafia lelei le kukaina o taumafa mai le malu taeao, suafai, panikeke, pai faapea kuka eseese ma le umu e manogi ai taumafa Samoa.
Sa momoli mai foi le faafetai a le afioga i le alii pule ma lona faletua aemaise le TIMMS Island Shop i le mamalu o le atunuu auā le lagolagoina o lenei faleoloa Samoa talu ona amata mai i le nofoaga tuai i Queen Street, St Mary’s.
