E faateia le silasila ma le faafofoga a mātua ma aiga ile afiafi ole Aso Sa ua mavae ina ua latou molimauina le matautia ma le maualuga ua oo nei iai taumafaiga a latou alo ma fanau ile taina ole piano ma usu a latou pese ile malumalu ole Ekalesia Metotisi i Mount Albert.
O nisi o mātua e leai so latou talitonu ile tulaga ua oo iai nai o latou alo, ona e mafaufau i latou o ni tamaiti e laiti faatoa ta‘i 8 tausaga a‘o lea ua mafai ona latou faaaogāina le meaalofa ma le taleni ua tuuina iai ele Atua auā ona viiga.
Na toto‘a lelei le silasila ma le maimoa ale mamalu o mātua ma aiga faapea ma uo, a‘o fai gaioiga o tamailima o tamaiti i luga ole piano i nota sa aoaoina ai i latou ele faiaoga.
E 23 fanau sa mafai ona faailoa le taleni i lea afiafi, ae o nei fanau uma o tamaiti mai atunuu eseese e aofia ai Samoa, Tonga, Saina, Palalagi, Siamani, Maori ma tamaiti Amerika.
E lua tausaga sa aoaoina ai nei fanau ile taina o lesona ele susuga ia Polima Salima ona agai loa lea ile taina ole piano ma usu pese i luma o tagata e pei ona iai lenei faaaliga.
Ole naunautaiga ole susuga ile faiaoga, ia tuu le tamititi e aoga ile lua tausaga ia faamasani ile vaai i nota ona oo atu lea ile taimi e tu ai i luma o tagata ae ua tea le fefe ma le palaai. Ole susuga lava ile faiaoga ia Polima Salima na ia faatautaia le faamoemoe ole fanau i lea afiafi ma faaiu ai loa ile iputi māmā na saunia ele faiaoga mo mātua ma fanau.
Ua iai nisi o fanau sa aooga ma faafailele atu le latou taleni i lenei aoga o lea ua faaaogāina lo latou agavaa ma le taleni i totonu o Ekalesia ile taina o viiga ole Atua, ma ua mafai foi ona latou tusiaina pese ma a‘o pese i totonu o aufaipese. E silia ile 12 aulotu oloo auai o latou sui aoga i lenei polokalame ma oloo vaaia le tuputupu ma le siitia o lenei faamoemoe mo tupulaga laiti i tausaga taitasi. Ole tausaga lenei ua atoa iai le 4 tausaga talu ona faavae mai lenei polokalame ale susuga ia Polima Salima, i lona naunautaiga maualuga ia faaaogā tamaiti ile taina o viiga ole Atua, ae ose ‘ai lelei foi lea mo mātua ile latou lagolago malosi ile unaiina o fanau e faaaogā le ola mo le Atua ma lana galuega. Ole tausaga fou e atoa iai le 5 tausaga o lana polokalame lenei e atoa ai foi ma le 10 tausaga talu ona ia tusia pese ile meaalofa ua tuuina ele Atua ia te ia.
Faailoa ele susuga ia Polima lona agaga fiafia tele ile finau o tamaiti pe a oo ile vaiaso aoga, ma ua faigofie ai foi ma lana galuega pe a oo ile taimi e ta ai lesona, ae o lana faafetai sili o mātua o nei fanau ile tuu mai o lo latou tau‘au e galulue faatasi ai auā lava se manuia o fanau ile lumanai. Tusa lava poo fea le ekalesia e tapuai ai, ae ole avanoa sili ona tāua ole faaaogā o tamaiti i totonu o ekalesia ae ole meaalofa foi lea a mātua mo fanau.
Ole tatalo a lenei tamalii ole atunuu ia umi pea lona ola, ma foai lona malosi auā le faasoaina o lana taleni mo fanau taitasi ole atunuu aemaise nisi o atunuu oloo fia manaomia lea avanoa tāua.
Aemaise ai o lona tusia o pese, i ata tifaga ma koneseti pese, e pei ole ata tifaga The Factory lea sa taamilo ai i Ausetalia ma Sikotilani ile tausaga 2014, ose faaaliga puupuu i talaaga o lona nuu o Safotu ma Faletagaloa Safune lea sa ia tusia ile tausaga 2015.
Lisi o Fanau na Auai ile Faaliga Piano:
Simi Sasagi; Sou Opapo; Henry Fitu; Luella Bracey; Florence Mase; Lala Tavesi; Jericho Avaiki; Sigalu Sasagi; Elijah Lasi; Grace Siitia; Junior Utumapu; Katerina Fale; Emma Huch; Le Manaia Ponifasio; Leilani Filemoni; Talalelei Taape; Sarah Latu; Xavier Setefano; Marie Kepaoa; Eseta Fale; Theodora Fomai; Canaan Setefano; Aisea Maile.
