O le amataga o le tausaga nei na faaeaina ai le sailiga malo a le tamaitai ia Faye ina ua manumalo lona lototau ma faauuina ai i lona faailoga o le Master Degree i aoaoga (education), ma avea ai o ia o se uluai Samoa e lē gata i tofiga taitai a le faalapotopotoga, ae ua mafai foi ona faauluulu ia te ia le faia o ni aoga e koleni ma aoaoina ai le mamalu o nai o tatou tagata mo le agai i luma, ae tainane foi isi tagatānuu o le Pasefika.
O le afiafi la o le Aso Sa na tuanai atu na faataunuuina ai le uluai faauuga sa tauaveina ma taitaia e lenei toa sailimalo o le atunuu i le aai o Melepone.
E to‘a 28 le mamalu o le aufaauu e lē gata o Samoa ma Toga, ae faatasi ai ma nisi mai isi atunuu, lea ua faaeaina i le mae‘a o o latou Diplomas ma Tusipasi 3 i le matagaluega o Aoga Amata (Early Childhood Education & Training).
Na faatumulia le malumalu o le ekalesia o le Gateway to Glory i le pitonuu o Sunshine i uo ma paaga aemaise o tauaiga o le aufaauu e molimauina ma patipatia o latou faiva ua a‘e manuia ma ua faaeaina.
Sa muamua le viiga o le Atua, ma amataina ai loa faiva alofilima o Faye i lana saunoaga faafetai i le pulega a le faalapotopotoga aemaise o lana faafetai i le aufaauu i lo latou agaga finau.
Sa faapitoa lana faafetai i o latou aiga ona o le lagolago, ae o le maitau a la tatou pepa, o le taimi pito i sili ona faaeaina o le taimi o le saunoaga a le pule sili o le faalapotopotoga, ma momoli ai lana faafetai ia Faye i lona agaga finau.
Na tutulai le aofia na potopoto ma patipatia le sailiga malo a lenei tamalii Samoa, na maitauina foi le sagisagi ma le agaga fiafia o le aufaauu uma i le tauaaoina o o latou tusipasi.
Na valaaulia faaaloalo le sui o la tatou nusipepa mo se saunoaga faalaeiau mo le aufaauu, ma saunia ai le tatalo faamanuia ma faapaia atu i o latou laasaga uma mo le lumanai.
Sa matagofie faafiafiaga a le Island Breeze, ae na lalelei naua le aufaauu i le valevale alofa o aiga ma uo i ulalole ma le sogi ma le faafeiloai o le faamanuia, ma faaiu ai i le taumafataga tele.
Malo tau malie toa, o outou māmā na! Ia alofagia e le Atua o tou faiva ma lavasiga uma.
