“O le a fo’ia ai faafitauli sa fai ma aliali mai”..EPC
Ua atoa le tausaga talu ona faaaoga le isi nofoaga mo le eletise ua fausia i Fuluasou tafatafa ane o le malae taaalo faavaomalo i Tuanaimato, e le mamao lava ma le nofoaga sa iai le faleeletise e maua ile suavai sa iai i Fuluasou i tausaga e tele ua mavae.
Peitai o le afa o Eveni na afatia ai le atunuu ia Tesema o le tausaga e 2012 na tolopo ai le tatalaina o le atina’e, lea na faatoa tatala aloaia ile aso Faraile na te’a nei ina ua maea ona fausia ai ma se isi auaunaga a le malosiaga faaeletise ose vaega e maua uma ai faamatalaga i nofoaga autu ile atunuu o loo maua ai le eletise.
E $6.2 miliona tupe Amerika le tau o ia galuega tetele e lua sa faatupe e le faletupe o atinae o Asia, le malo Iapani ma Ausetalia. O se konekarate mai Niusila na fausia le nofoaga tau eletise ma ose nofoaga ua mafai ona fesootai ai le faleeletise i Fuluasou ma le faleeletise e maua mai le suauu kiso o loo i Fiaga faapea le faleeletise o loo i Tanugamanono.
O se uaea poo se cable o loo tanumia ile eleele ma se laina eletise i luga o pou eletise o loo maua ai lea fesootaiga.
Na saunoa le Palemia ile tatalaina o le galuega, o lea ua vaeluaina fesootaiga tau laina eletise uumi sa iai, ina ua fausia le faleeletise i Fuluasou. O se taumafaiga o le a mafai ona vave maua ai ni faaletonu e tulai mai ile auaunaga tau eletise mo le itu i sisifo o Upolu, aemaise o lea foi ua fesootai tuusa’o atu ai le eletise i kamupani ma pisinisi o loo i le nofoaga mo kamupani ma pisinisi i Vaitele le Industrial zone. O se fesootaiga ua tuusao atu ai laina eletise i lea nofoaga ma lelei ai le auaunaga tau eletise e maua e kamupani ma pisinisi eseese o loo iai nei i Vaitele.
O le tasi o vaega o le atina’e e pei ona iai nei se nofoaga i le faleeletise i Fuluasou e aoina uma ai faamatalaga mai isi nofoaga autu, e le gata i lea tulaga ae ua maua ai foi ma ata e iloa atu ai ia nofoaga, ma iloa ni faafitauli e ono tulai mai ai. Sa silasila le Malo ma sui na auai ile tatalaina o le galuega i ata o nofoaga tau eletise i Savaai e pei o le nofoaga i Salelologa, aemaise o isi nofoaga i Upolu e pei o Fiaga ma Tanugamanono.
Na faaalia e le alii pule o le EPC a iai ni faaletonu ile motusia faafuasei o le eletise, o le a mafai i le auaunaga lea ona saili tonu poo fea o loo tulai mai ai le faafitauli. 
