Siamupini tama Vaifagaloa ma teine PIC taamilosaga kirikiti i Melepone

Na faamae‘aina i le Aso Lulu o le vaiaso na tuanai atu le taamilosaga kirikiti a le Fono Faufautua mo Tagata Samoa i Vitoria e pei ona sa amataina i le Aso Gafua.
E iva ‘au a alii na tausinio, ae tolu ‘au a tamaitai, ma na faamae‘a lava i le uluai aso le taamilosaga a tamaitai.

Na tulai mai ai i le Siamupini le ‘au a tina ma tamaitai o le Ekalesia PIC i le Ipu ma le faailoga tupe e valuselau tala, tulaga lua Teine o le Fetulele i le Ipu foi ma le faailoga tupe e onoselau tala, ae tulaga tolu Teine o le M’ckay i le faailoga tupe e faselau tala.
I le mae‘a ai o taaloga a pools na vaevaeina i ai le taamilosaga a alii, na maua ai ‘au e fā pito i luga na sailia semi fainal o Tama o le West, Tautai o le Vasa, EFKS a Brimbank ma Tama o le Vaifagaloa 2.
E ui i le malolosi o ‘au uma ma faigata taaloga, peitai na manumalo Tama o le West i le la taaloga ma le Tautai o le Vasa, ae malolo le EFKS i la la taaloga ma le Tama o le Vaifagaloa 2, ona tasi lea o finagalo o le Tautai o le Vasa ma le EFKS a Brimbank e faatutusa laua i le tulaga tolu ae se‘i tapuaia le taaloga o le siamupini, e pei la ona tulai mai le iuga o le taaloga matagofie ona o le faatausala o ‘au e lua, ua siamupini ai le au a Tama o le Vaifagaloa 2 i le Talita, o le Ipu autu o le taamilosaga ma le faailoga tupe e tolu afe tala, o Tama o le West na o latou mauaina le Ipu ma le faailoga tupe e tasi le afe ma le limaselau tala, ae tutusa le EFKS a Brimbank ma le Tautai o le Vasa i faailoga tupe e ta‘i onoselau ma le lima sefulu tala.

Na tofu faailoga tupe uma foi ‘au a alii mai le tulaga fā e oo i le tulaga iva, o isi faailoga e pei o le ‘ai silia a alii na maua e Le‘uo Talia Tapaleao o le EFKS a Brimbank, a o tamaitai na maua e Tina o Teine o le Fetulele, ‘olo silia a alii na tutusa ai Toa o le Tama o le West ma se tasi tamalii o le ‘au a le LMS Pasefika, a o tamaitai na maua e Lina o le Teine o le Fetulele.

O faailoga o le ‘au maopoopo ma le togiga matagofie na maua e le Ekalesia PIC, tagata taalo o le taamilosaga na maua e Gasio o le Tama o le Vaifagaloa 2, ma le faailoga faapitoa mo le kapeteni faamaopoopo na maua e Tagaloa o le Tama o le West.

Ina ua mae‘a tufaga faailoga, na saunoa faafetai le taitaifono ma le taitai komiti o taaloga i ‘au uma na tausinio, faapea le Aufaigaluega Paia ma Samoa na potopoto, aemaise o kamupani na lagolagoina le taamilosaga (sponsor) e pei o le Bank of Melbourne, QSI Car Rental, Kiwi Pacific Store, Iniini Ausetalia aemaise o le City Council a Darebin.

Sa lagiina le Lota Nuu, ma faaiu ai i le tatalo na fofogaina e le faafeagaiga ia Simalu Cowley, ma ta‘ape ai ma le manuia. Viia le Atua ua iu manuia le Taamilosaga o le 2015. Tatou feiloai i lena tausaga.
Le ‘au malosi a Tama o le Vaifagaloa 2…Siamupini 2015

Le ‘au malosi a tamaitai o le PIC na sola ma le Siamupini 2015

Tamaitai pule o le Bank of Melbourne, Tua Ale i le tauaaoina o faailoga i le Siamupini, kapeteni ma le pulega a Tama o le Vaifagaloa 2