O se tasi lenei o taamilosaga na uluai amata mai i le itumalo i Waitakere i aso ua mavae atu, sa tele ina tauva ai le tele o ‘au mai atumotu eseese o le Pasefika o loo faamautu i Niu Sila nei.
E manatu o le nofoaga Te Pai Netball Courts sa tele ina faataunuuina ai i la aso, faasolo mai ai i le nofoaga o taaloga netiopolo i Mangere, ae o lea ua foliga mai ua mautu i le nofoaga fou lenei, le AMI Netball Courts, i Mt Wellington ma o se nofoaga ua tapena lelei mo taamilosaga tetele faapenei, ma o se nofoaga ua saunia lelei i le atinaeina o lenei lava taaloga o le Netipolo i Niu Sila lava latou ia.
O le faaiuga la o le vaiaso na se‘i mavae atu nei i le Aso Toonai sa faagasoloina ai loa lenei taamilosaga i lea lava nofoaga ma sa vaaia le faatumulia o lea foi malae taaalo mo lenei lava taaloga Netipolo.
O le taamilosaga lenei o le Pacific Challenge Cup Netball Tournament, o se taamilosaga ua pei ua avea ma aso taalo faapitoa mo atumotu Pasefika i le felanulanuai ai o ‘au eseese o loo auai ai i tausaga uma, ma o loo vaaia pea le faasolosolo pea i luma le toatele o le agai pea i ai o tagata mo le maimoaina.
I taaloga la o le tausaga nei sa auai ai Niue, Cook Island, Tonga, Tuvalu, Samoa sa lē mafai ona auai ai le ‘au mai Fiti ona sa faataunuuina ai foi i lea aso le aso faapitoa a Fiti poo le “Fiji Day”.
Na vaaia le taupati atu o mātua e tapuaia alo ma fanau i lenei taaloga; o le taamilosaga foi lenei e faataunuu i tausaga uma. O le ‘au mai le Cook Island na manumalo i le tausaga talu ai, peitai o le tausaga nei, faatoa toe oo lea o Samoa i le tulaga Siamupini talu mai le fā tausaga talu ai.
I le faatulagaina o le polokalame i lea Aso Toonai, na amatalia lava i le savali a atunuu taitasi. O le savali a Samoa na taitaiina e le kapeteni o Eseta Tupu i ona laei faasamoa ae aiaiuli mai ai i tua ‘au taitasi ia latou puletasi ua felanulanuai ai le malae netipolo i Panmure. Na muai faafeiloai e Eseta Tupu ‘au a Samoa i tautalaga a kapeteni uma o atunuu taitasi na tauva i lea aso.
Saunoa le afioga i le faatamā a le Asosi Netipolo a Aukilani Samoa le afioga Su‘a William Sio e faalaeiau i ‘au tauva uma ma faapea lana saunoaga, “e matagofie i lana maitau le auai o alii i tauvaga netipolo a tamaitai, e ese mai i tauvaga a alii e seāseā ona valaaulia tamaitai e tauva faatasi ai ma alii.”
Saunoa le tamaitai o April Ieremia le alo o Samoa na avea ma Silver Fern i tausaga ua mavae, e faailoa i tamaitai le tāua i soo se tagata taalo o lou malamalama lelei i lou tagata, e faafaigofie ai ona maua le lototoa e tauva ai mo lou atunuu.
Na sosoo ai ma le tatalo na saunia e le susuga i le Peresitene o le asosi Netipolo a Aukilani Samoa Setu Veve ma tatalaina aloaia ai loa te tauvaga e le kapeteni a Samoa le tamaitai o Eseta Tupu.
E 21 ‘au a Samoa na faaulu i lenei tausaga – Under-11s 4, Under-13s 3, Under-15s 3, Under-17s 2, Under-19s 1, Under-21s 1, Open Prems 2, Mixed Team 3, Prems 1, Mens 1.
Faaiuga o taaaloga
Pine Auro (winners) u11.1, u11.3, u15.1, u15.2, Premier, Men
Pine Siliva (runners up) u11.2, u11.4, 13.1, u17,1, u21s, Ppen Prems 1, Mixed Team 2, Mixed Team 3.
E 2 ipu tetele o lenei tauvaga, e 1 mo le ‘au a alii ma le isi mo le atunuu e manumalo i le tuufaatasiga o ‘ai lea na manumalo uma ai Samoa i ipu uma e lua.
Matagofie taumafaiga a alo ma fanau a Samoa faapea foi ona matagofie i le maitau a le komiti le lagolago mai o sui tuai o le National team a Samoa i tausaga ua mavae le tamaitai o Monica Gabriel ma Kisa Leuluai sa taaalo mo le au Premier, Faaniniva Sililoto ma Italia Tipelu mo le ‘au a le Open Premier 1, faapea sui o loo taaalo i le taimi nei o Hanalei Temese, Auteletoa Tanimo mo le au Premier.
E lē gata i lea o le tamaitai o April Ieremia na avea ma Coach mo le u17.1. O le auai mai o nei tamaitai o le faailoga lea o le maualuga o le tulaga o le netipolo mo alo ma fanau Samoa i Aukilani nei faapea le faaalia ai o lo latou lagolagosua mo le lumanai o nai a tatou fanau lalovaoa.
Na vaaia le lagolagosua a mātua ma aiga i le faatumulia ai o le malae i Panmure i ofu lanu moana, o le faailoga o le lotonuu ma le faamoemoe ia manuia taumafaiga a alo ma fanau.
E momoli atu ai le faafetai ma le faamalo mai le komiti a le Asosi Netipolo a Samoa i Aukilani, le susuga a le Faatamā i le Tofa Su‘a William Sio faapea le Peresitene Setu Veve, failautusi Barbara Tuiasau, teutupe Amanda Lam ma Harry Motufoua faapea le lautele o le komiti ia Gaylene Wilson, Faaniniva Sililoto, Tuifaasisina Neta Tomokino, Venu Brown ma Salome Fouvale i le lagolagosua ma le taupati mai o mātua ma aiga aemaise le fanau auā le faalauiloaina o si o tatou atunuu pele o Samoa i lenei foi faagatama o le netipolo.
Ua outou sii Samoa i le numera tasi, malo le tau, malo le fai o le faiva, malo le lotonuu. O le upu a le tusi, “A mae‘a se galuega ua matagofie, ia tatou faapea ane, O auauna lē aogā i tatou.”
E momoli atu ai foi ma le faafetai faapitoa i sponsors le Pacific Inc mo mitiafu taalo a ‘au taitasi faapea le Ash NZ mo polo na faaaogāina i toleniga faapea le taaloga i le Aso Toonai.
Ia ua nofosauni atu foi la Samoa e puipui le Siamupini i le tausaga a sau, ma faaauauina ai pea le taamilosaga.
