Ose aso malulu male savili le Aso Toonai 27 o Aokuso, na faatino ai taaloga a Kolisi ole Laumua ile malae ole Kolisi a St Patricks Silverstream mole sailiga ole manumalo aoao.
Ole iuga na maua, e 26 St Pats Town ae 24 St Pats Silverstream ile U15. Ose sikoa vavalalata ona sa tau fai malolosi uma ‘au e lua, peitai na malosi le puipui/tetee atu ale kolisi i Ueligitone ile ‘au ale Kolisi o St Pats Silverstream.
Na matuā fiafia faiaoga ole ‘au: Sonny Whitmann, Al Turrell faapea a latou managers o Sonny Mulitalo ma Daniel Silvester ile iuga ua maua, ma ua siamupini ai nei le ‘au i lenei tausaga. E faapea foi le agaga faagaeetia o kapeteni e toalua o Boston Christie ma Malachi Tia ona ole taaalo malolosi ole latou ‘au lea ua siamupini ai.
Oloo ua sauni atu nei le au siamupini U15 e malaga atu i Aukilani e taaalo ai ma ‘au uma a kolisi ile faagasologa o taaloga ale atunuu atoa oloo faia ai i lenei vaiaso. Talosia ia iu manuia a latou taumafaiga.
Ole isi ‘au a St Pats Town ole U55kgs na sue fusi male kolisi a Paraparaumu ma manumalo ai ile siamupini e 32-29 ai. Fai mai o tamaiti sinia lava ole kolisi a St Pats Town o Zyan Goonewardene ma Harry Bartle ae lagolago iai Damen Rapira-Davies o faiaoga na ole aulakapi lea.
Ole kapeteni ole ‘au o Josh Rowan. E leai se isi e lei lagona le fiafia tele ile foi ole kolisi ma siamupini e lua o taaloga tuufaatasi a kolisi ole Laumua. Fai mai o nai mātua ua tau fai fiafia ua tauia lo latou faamalulu ile umi ole sailiga siamupini.
E avatu ai le faamalo ale Sooatulau i nei ‘au e lua ua ausia le siamupini o faagatama a kolisi ole Laumua i lenei tausaga. E faafetaia foi le tapuaiga a mātua ma faiaoga uma o aoga taitasi.
