Siamupini le Povi Po‘a i le Faatau‘i’s Super League o Kirikiti

Siamupini – Povi Po‘a mai NZ na maua pine auro, talita ma le $20,000.00; na maua foi le faailoga $100.00 mo le ‘au e sili ona matagofie le latou Togiga mitiafu

E tolu aso na faagasolo mai ai le liki o le kirikiti sa faatautaia e le Lionheart Promotion lea sa faaigoaina lava i le suafa o si o latou tuaa (Faatau‘i’s Super League). Na amata mai le aso 28, 29 ma le 30 o Tesema 2015.

E 7 ‘au sa tausinio e aofia ai le au e tasi a le Matagi Tokelau, Brisbane Spider, Big Boss A, Big Boss B, Vaa o Manū, Aso Fiafia ma le ‘au e tasi mai Niu Sila ua igoa o le Povi Po‘a.

Na sologa lelei le taaloga i aso e tolu ma o le aso faaiu sa tauva ai ‘au e fā e saili ai ‘au e sue ai le tulaga fā, tulaga tolu, ma ‘au e lua na pito i luga lea sa tauva e saili ai le manumalo aoao i le liki.

O ‘au e lua na pito i luga na taaalo, o le ‘au a le Big Boss B ma le ‘au a le Povi Po‘a ma siamupini ai loa le Povi Po‘a. Na matuai afifi lelei faapepe ma numinumi e le Povi Po‘a le latou  $20,000.00 ne‘i leiloa ae o loo faatali mai le tapuaiga a aiga faatasi ma le ipu ma pine auro.

O le ‘au foi a le Povi Po‘a na mauaina le ‘olo silia na faamanuiaina ai Samuelu. O le afioga ia Lemalu Apelu o le ‘au a le Aso Fiafia na ia maua le ‘ai silia o le taamilosaga. O Misionare So‘e o le au a le Big Boss B na avea ma best player o le taamilosaga.

O le Togiga na sili i le matagofie ma le manaia le ielavalava na maua e le Vaa o Manū,  na saunia e le susuga i le Toeaina ia Faatui Leati se faaailoga mo latou e $300.

O le mitiafu matagofie na maua e le Povi Po‘a na piki e le peresetene ia Faatau‘i ona o le faatāuaina o le igoa o le Liki “Faatau‘i’s Super League) na maua le $100.

O le tofa ia Faatau‘i ma le tausi ia Leitu e alaala i Samoa ae na malaga mai lava ma nisi o le fanau e fia auai i le faamoemoe lea la ua uli ma sao i le alofa ma le agalelei o le Atua.

O lenei taamilosaga na faasalalauina i le paka e sui o leitio e lua, 4EB ia Leautuliilagi Malaeolii S Vaa Leapai ma Leafinealii Fauea T Fauea o le Penina o Asuisui 1197am.