Siamupini le Aute Samoa Taamilosaga All Samoan 2012

O le taamilosaga tapolo o le All Samoan Amateur Annual Golf Tournament 2012 na talimalo ai le au malosi a le Wellington Canes mai Ueligitone, e pei ona faataunuuina ai i le Aso Lulu, Aso Tofi ma le Aso Faraile o le vaiaso na tea atu nei.

E pei ona masani ai i tausaga taitasi, e faasolo lava i kalapu le avanoa e mafai ona talimalo ai i lenei lava taamilosaga. E tusa ma le 11 ‘au na mafai ona tausinio mo lenei faamoemoe, e 2 ‘au mai Brisbane Ausetalia; Talofaalii ma le Multicultural, 1 le ‘au mai Sydney: LaTasi; 4 ‘au mai Samoa: Brothers and Sisters, Fagalii Golfers, Maugafolau ma le Vai o Tausala; 2 ‘au mai Ueligitone: Pasefika Golf Club ma le au na host o lenei tausaga, le Wellington Canes; ma ‘au e 2 mai Aukilani o le Penina Golf Club ma le Aute Samoa Golf Club.

O le susuga i le toeaina Reverend Elama Maea o le PIPC na tatalo e tatalaina aloaia ai le taamilosaga i le taeao o le Aso Lulu, a o le susuga i le toeaina Reverend Popo Su‘a o le EFKS na saunia le lotu e taualuga ai le faamoemoe i le po o le Aso Faraile i le taimi o le Prize Giving.

O le tausaga foi lenei na aloaiaina ai le tauaaoina o le Trophy fou mo lenei taamilosaga ua faaigoaina o le Malietoa Tanumafili II Memorial Trophy e pei ona tapenaina e le ‘au a le Wellington  Canes.

Na vaaia le mataalia o ‘au uma o le taamilosaga mai lava i le aso na amataina ai seia oo i le toe aso o le taamilosaga, e pei ona faataunuuina i le Shandon Golf Club i Petone, Lower Hutt.

O nisi o malo faaaloalogia na mafai ona faatasi atu e molimauina le tausinioga pei ona i ai i le taimi o le Prize Giving, o le afioga i le Faamasino sili o le malo o Samoa Vui Clarence Nelson ma lona faletua, faapea foi ma le Hai-Komesina o le malo o Samoa i Ueligitone, Afioga Leasi Papalii Tommy Scanlan ma lona faletua, aemaise o le aufaigaluega a le Atua na mamalu ma matagofie ai mea uma o lena foi afiafi.

O le faaiuga o le taamilosaga o le 2012 mai le tulaga 5 na maua e le Brothers and Sisiters, tulaga 4 na maua e le au a Fagalii Golfers, tulaga 3 na sola ma le au na Host le Wellington Canes, o le tulaga 2 na mauaina e se tasi o au mai Samoa le Maugafolau, lea o le a Host i le tausaga fou 2013, a o le Siamupini o lenei tausaga 2012 ua manumalo ai le Aute Samoa Golf Club mai Aukilani.

O le afioga i le Hai-Komesina o Samoa i Ueligitone, Leasi Papalii Tommy Scanlan na tauaaoina atu le Trophy i le peresetene o le au na manumalo le susuga ia Tavai Meni, lea na ia ta‘ua i lana saunoaga, o le sauni ai o le Aute Samoa i le taamilosaga o lenei tausaga sa lei faigofie, ona o le lē mafai ona latou faatasi ai ma le kapeteni o le latou ‘au le susuga ia Taueu Fainuulelei, na maliu i le Aso Lua, 24 o Setema i le maota gasegase i Aukilani, a o alofaiva le Aute Samoa mo le taamilosaga i Ueligitone.

Na ia ta‘ua foi o le malo ai o le Aute Samoa o se latou meaalofa sili lea mo le latou kapeteni e pei ona faamavae atu i ai i le Aso Toonai na tea atu nei.

Manuia lau malaga Taueu Fainuulelei mai le faatamā (Patron), Reverend Iosefa Rimoni ma le kalapu a le Aute Samoa Golf Club.