Taamilosaga tagapolo
O le Aso Toonai la na sei mavae atu nei, o le aso tonu lena na pa‘ū tonu i ai le taamilosaga tapolo lea e pei ona masani ai tausaga taitasi, e manatua ai pea le tautua a le toeaina malolo manumalo ia Rev Leuatea Sio a o soifua i galuega, aemaise ai lava le taulamua i le faamautuina o le tele o tagata e malaga mai i Niu Sila, faapea foi lona sao tele i taaaloga ua lē masino mai lea taaloga i lea taaloga, e ui ina ua fai i lagi le malaga a lenei tamā aoga.
Ua avea le taamilosaga tapolo i le Ipu ua faaigoaina “Leuatea Sio Memorial Trophy” e lē gata o le a tumau ai pea ona manatua o ia, ae o se luitau foi lea e lagalaga i le faia o galuega lelei mo tagata e lē faatuaoia. Na vaaia i lea aso le toatele o tamalii e fiafia i lenei taaloga sa tausinio ai i lea aso, aemaise foi le molimauina ai o le itupa a tina ma tamaitai sa tausinio ai foi i le taamilosaga.
O le afioga ia Toalepai Lui Tautolo sa faauluulu i ai lea aso, ma sa ia saunoa foi e faafetaia le alalatai ai o kalapu tapolo uma sa auai, ina ua mae‘a se saunoaga faafeiloai a Rev Tafatolu Filemoni ona o le lē auai ai o le Peresitene o le kalapu Tapolo a le “Afio Mai” e tusa ai o le faamoemoe o lea aso.
Sa laulaututu kalapu tapolo mo le ‘afa sekone e manatua faapitoa se tasi foi iloga o le taaloga tapolo ia Taueu Fainuulelei i lea aso ona o le faafuaseia o lona toesea. Matagofie tulaga uma o le aso e lē gata i nisi o Faifeau tausi Ekalesia sa auai ua atili maualuga ai lea aso, i tufagā faailoga ia sa mataina ma matagofie mea uma.
Ua avea nei le kalapu Tapolo a le Aute Samoa o le siamupini o lea taamilosaga ma ua latou umia nei le Ipu ua Faaigoaina “Leautea Sio Memorial Trophy”. Ua faamoemoe i le Aso Toonai lona lua o Novema o le 2013 e toe faaauauina ai le taamilosaga. Na faaiuina lea faamoemoe i le tatalo na taitaia e Rev Tafatolu Filemoni ona tatala ai lea le filialii ma toe taliu i itumalo ma afioaga tamalii sa auai i lea aso.
