Siamupini Laotikaia i le tuufaatasiga o polokalame a le Autalavou a le ekalesia AOG Kingston

Ua iite fanua a lalo ma ua toe foi ose aga ona tatou tuvae atu lea ile faaiuga o lenei tausaga e taualuga ai foi galuega faagasolo sa fita’ituga iai le mamalu ole atunuu.

O taimi faapenei e tulimata’i iai le silasila a le toatele aua ole ‘auga foi lea o faigamea. O se aso fiafia ua le gata i tagata taitoatasi, ae faapea foi aiga, Ekalesia ma faalapotopotoga. E pei foi ona faia ai se feiloaiga ale Ekalesia AOG a Kingston.

O le aso Toanai 18 o Oketopa sa faatino ai le samiga ipu a le ‘au a Laotikaia,le siamupini o le tausaga 2013/2014.
E ao lava ona sii muamua mea i Matautu Sa aua sa siitia le viiga e ala ise suniga lotu puupuu na ta’ita’ia lava ele susuga i le faafegaiga, Susuga ia Ps Manuula Nai, ole faafeagaiga o le ekalesia.

Na ma’ea ona feagai loa lea ma se taumafataga tele na saunia lava e le au a Laotikaia. Na matuai leai se faatafa ile au na manumalo ua le gata i le laufofoga fiafia ae na o latou faia le mea sili mo isi ‘au uma e faailoa atu ai lo latou agaga fiafia ma le olioli.

O le susuga i le alii taitai o le ‘au a Laotikaia, Susuga ia Moana Boznanski na saunoa aua foi faaaloaloga masani a le atunnuu i aso faapenei e ao lava ona faailo ai le fogatia, aua e le gata i le auauna a le Atua ae faapea foi le peresetene ole autalavou ma lona ofisa. E toatele nisi sa auai ma molimauina lenei aso faapitoa aua ele gata o le ekalesia ae faapea foi tau’aiga mai isi ekalesia.

O le tofa ia Puipuifatu Tupu na tasi iai Pule ma Tumua aua se faafetai mo le auvalaaulia faapea le ekalesia. Na faaiuina lea aso i le viiga ma le faafetai i le Atua, ona ua tau lau o le faamoemoe. A mae’a se galuega, e ao lava ona toe fo’i le faamanu i le e ona le malosi uma lava, o le Atua lea.

O le susuga I le ta’ita’i o le ‘au a Laotikaia o Moana Boznanski ma le faletua ia Afioga mai i Alamagoto i Apia, ma le sui kapeteni susuga ia Taua Faasoo ma le faletua ia Pefia mai i Lepea ma Fagaloa.
Siamupini Laotikaia i polokalame Autalavou ekalesia AOG Kingston.  photo: Fauea Terry Fauea