Na sola le kolisi o Leulumoega Fou ma le siamupini ole taamilosaga taitoafitu a kolisi maualuluga ale atunuu e pei ona sa faataunuuina ai ile malae taalo ole Apia Park ile Aso Faraile na tea nei, 2 o Mati 2018. Ole lua ai lenei o tausaga o faatautaia ai le taamilosaga taitoafitu lenei a fanau aoga e pei ona faatamoe ai e le Iuni Lakapi ale atunuu.
Ile faagasologa ole taitoafitu lenei ua tutusa lelei ma le auala e pei ona faatino ai taaloga afeleti a aoga maualuluga i tausaga taitasi, e faagasolo muamua ai taaloga mo sone taitasi e pei ole sone A, sone B, sone C ma le sone D, ma o ‘au e maualuga ai a latou taumafaiga mai i sone taitasi e saofagā ai lea ile sailiga siamupini.
E tolu vaega na faatino ai le taamilosaga taitoafitu lenei, ole vaega mo tama laiti i lalo ifo ole 16 tausaga le matutua (under 16s), ole vaega o tama matutua i lalo ifo ole 18 tausaga le matutua (under 18s), faatasi ai ma le itupa o tamaitai i lalo ifo ole 18 tausaga le matutua.
Ose tasi o ‘au na mataina foi le taaalo i lea aso, ole ‘au lea mai le kolisi ole Alofi o Taoa mai ile afioaga o Fagaee ile motu tele i Salafai, na malolo ai ile la semi final ma Sagato Iosefo ile ipu autu e 14 ile 17.
Ae mo le sailiga siamupini o vaega taitasi na manumalo ai le Kolisi o Samoa ile la sailiga siamupini ma Sagato Iosefo mo le vaega o tama laiti i lalo ifo ole 16 tausaga le matutua e 12 ile 5. Ile sailiga siamupini mo tama matutua le Under 18’s na molimauina ai le finau malosi ole ‘au ale Kolisi o Leulumoega Fou ma o latou faatoilalo ai Sagato Iosefo e 26 ile leai ose ‘ai a Sagato Iosefo.
E iai le talitonuga ole Iuni Lakapi ale atunuu e telē se lumanai manuia ole ‘au taitoafitu ale Manu Samoa e maua atu i alo ma fanau nei o taaalo ai i Kolisi Maualuluga, ma ole a faigofie ai foi le galuega a faiaoga mo le fiifilia lea o ‘au faavaomalo ale atunuu ile lumanai. Na faalauiloa aloaia ane ai foi ele komiti o aoga maualuluga le faaopoopo mai ai foi ole ‘au 14 tausaga a fanau ile taamilosaga lenei ile tausaga fou. Na tumutumu le malae taalo ole Apia Park mai tapuaiga a laumua taitasi aemaise ole agai atu o mātua e sapasapaia le taumafaiga a alo ma fanau mai i kolisi eseese ale atunuu. Na auai foi i lea aso le faiaoga ole aulakapi a Samoa mo i latou e i lalo ifo ole 20 tausaga le matutua, Laauli Rudy Leavasa, e mataituina le taaalo ai o tama aoga ina ia maua ai nisi e tapena ai le ‘au a Samoa mo taamilosaga faavaomalo o lenei tausaga. Ta’ua e Leavasa, ole aogā ole taamilosaga lenei e maua ai ma le avanoa o faiaoga e matamata ai i nisi o alo ma fanau talavou, aemaise lava ia i latou o taaalo mai ai i aoga i nuu i tua faapea ai ma aoga mai le motu tele i Salafai.
Ta’ua foi ele alii Peresetene ole taamilosaga lenei a Aoga, le susuga Matafeo Reupena Matafeo, ole pule aoga foi lea ole kolisi o Avele, ua telē lava le suiga ole taamilosaga lenei a kolisi maualuluga ale atunuu ile tau fai finau uma o ‘au mai sone taitasi ina ia maua ai se avanoa ile sailiga siamupini, e oo lava foi ile faatinoina e le fanau ole taaloga ile aso ole sailiga siamupini, e maeu le maualuga ua oo iai le tomai o tama ma teine lakapi nei.
Aemaise ai ole malupuipuia lelei ole faatinoina o taaloga ele Iuni Lakapi ale atunuu, ma ua lē toe maua ai se faitio i faaiuga a laufali aemaise o i latou o faafoeina lenei taamilosaga. Talitonu le alii Peresetene, ole a siitia maualuga lenei taamilosaga ile tausaga fou, aemaise ole finau mai foi a ‘au taitasi e maua ai se avanoa ile aso ole sailiga siamupini.
