O le uluai tauvaga lakapi sefululima a le Pasefika i Sini nei i atunuu e fa, o Tonga, Samoa, Fiti ma Aporiti, na matuā faatumulia ai le malae lakapi o le Parramatta Two Blues i le Aso Gafua talu ai. O le taimi muamua lenei ua malilie ai nei atunuu e tuufaatasi a latou aufili i totonu lava o Sini mo lenei tausinioga.
Na mafua lenei faamoemoe ona o se naunautaiga a le afioga i le Peresetene e fesoasoani i le faaolaolaina o le agaga galulue faatasi o tupulaga o nei atumotu o loo aumau i Sini nei, ma fealofani auā le tuliloaina o nai a latou taleni e fesoasoani ai i atunuu o tupuaga, aiga, ekalesia ma Ausetalia aemaise o le avanoa e taaalo uma ai i se tauvaga maualuga i lo o le faaleoleo ma solomuli ese ai mai ‘au a latou kalapu ma aufili i Sini nei.
O le ‘au a Sydney Samoa Barbarians na faiaoga ai Jason ma Jason Lemusu na tala malae ma Aporiti, ma na vaaia le mataina o le malosi o le ‘au a Barbarians aemaise le Indigenous XV lea na laei i le togiga a Ausetalia e pei ona faamatuu mai e le Iuni a Ausetalia.
O le iuga o le taaloga muamua na malo Samoa e 24-5 sosoo ai ma le taaloga a Tonga Lupeeva ma Fiji Saints. Na matuā iloga le tau fai malolosi o ‘au nei auā e lē gata i le lapopoa ma le uumi ae faapea foi le lava tapena o le mānava.
Na sili lava Tonga Lupeeva i le 8-0 ae peitai na toe sikoa lava Fiti i le faaiuga ma manumalo ai e 12-8. E mae‘a le taamilosaga muamua (Round One) o sili Samoa faapea foi le lona lua. Na manumalo Samoa ia Tonga 17-12 faapea Fiti e 12-10.
Na matuā iloga foi le faafiafiaina o le silia ma le lima afe tagata na maimoaina lea uluai tauvaga, i faafiafiaga a ausiva mai atumotu o le Pasefika.
O le tamaitai o Soa Taupeafe mai Tonga na feagai ma siva o la latou atunuu aemaise le taualuga. O le ausiva a Evana ma le tamaitai Pule ia Priscilla Ale na sausaunoa i faafiafiaga faa-Fiti, Samoa ma Maori. Peitai o le tamaitai Rarotonga ia Maruia Taia na silamiō ai le aofia i lana faafiafiaga tamure. O le po lava lea na tuua ai Sini mo Lonetona e lana ausiva le ONE Roar e faafiafia i le tauvaga laei a le Pasefika i Lonetona.
O lea foi aso na matuā pisi ai faleaiga eseese na auai mai Tonga, Fiti, Samoa aemaise le Taitoafitu Siamupini a Moataa lea na taunuu mai Melepone ma le Ipu o le Siamupini a le taitoafitu na valaaulia ai.
O taumafa eseese e pei o le Lu mai Toga ma le vai meleni na alumia i le vevela o le aso, Lovo poo le umu faa-Fiti aemaise le Roti ma le Kale.d.BBQ faapea taumafa Samoa o le faausi, sapasui, oka ma panikeke ma le kekepuaa.
E tele foi meaalofa na foaina e le Western Union i lea aso mo le fanau ma tagata uma e pei ona faafiafiaina ai le tamaitai pule ia Eseta Faitua. Ina ua mae‘a taaloga e ono, na tuali mai ai le Indigenous XV i le tulaga fā. Tolu Tonga ae saili e Sydney Samoa Barbarians ma Fiji Saints le Siamupini.
Na maofa le aumaimoa ona o le lava o le mānava a ‘au e lua aepeitai na sikoa Fiti mai sa latou pasipasiga mai tua o le ‘afa o le malae ova le a‘a mo ai e fiti i le leai mai le afa muamua. Na matua fiu Samoa e osofai le laina a Fiti.
I le ‘afa mulimuli na amata ona avanoa le puipui a Fiti aepeitai e lima lava ni avanoa na toe ai o Samoa ma le laina ae pa‘ū le polo pe pasi foi i luma. Na mae‘a le taaloga ma Sola ai Fiji Saints 7-0 ma le Ipu matautia le lapoa aemaise le $1000. O Samoa Barbarians na maua le $750,Tonga e $500 ma Indigenous e $300.
O le tausaga fou ua manatu le Afioga i le Peresetene ia Leilua Jerry Uesele o le a siitia ai faailoga faapea le faaleleia atili o itu uma ina ua vaaia le opogi maoae a le Pasefika i lenei tausaga muamua.Na ia faafetaia ai foi le lagolago a sui o le komiti e pei o Wise Butuki o Fiti le Failautusi,Angina Lapaa o Tonga o le Teutupe ma le sui o le ARU ia David Hawkins.
