E ui o le mataina o le manumalo a le Kaupoe mai Kuiniselani i Matu 17-16 a le Broncos i le sailiga siamupini o le NRL 2015, ae na maua e Anthony Milford o le Broncos le faailoga taualoa a le kalapu o le ‘Tama Taalo o le Au 2015’ lea sa filifilia lava e tama taaalo ma le pulega.
Sa leai se finauga i lenei faailoga talu ai e uma lava le sailiga siamupini o taumafai lava lenei alo o le atunuu i se auala e manumalo ai lana ‘au.
O le sikoa muamua a la latou uigi ia Corey Oates na seki foi e Milford mai tua o le laina 22 ma sao atu ai Oates.
E ui i lea e tolu sikoa a le Kaupoe ae lua sikoa a le Broncos ma e uma ane le taimi ua tutusa e ta‘i 16-16 i se sikoa a Kyle Feldt o Kuiniselani i Matu ma toe ola ai le Kaupoe.
O le kiki mai le tulimanu a Thurston na tau i le pou faalava ma le manuia na aga ai loa le taaloga i taimi faaopoopo lea o le au muamua lava e maua le ‘ai e manumalo.
Na faapea o le taimi lea e tamoe ma kami solo ai Milford ae na palasi le polo mai lima o lana numera fitu ia Ben Hunt ma maua ai e le Kaupoe le polo ma osofai ma kolopu ai loa e Thurston le ‘ai manumalo 17-16.
O isi alo o Samoa na mataina la latou taalo mo le Kaupoe e iai le uigi ia Antonio Winterstein ma John Asiata.
O le isi alo sa iai i le aufaaleoleo ae lei laei i le togiga e aofia ai Tautau Moga, ma o se taimi muamua lea ua siamupini ai lenei ‘au.
Mo le faiaoga ia Paul Green, o se lagona faagalogata aemaise o le taua o le mafaufau ma le susuga iloga ia Wayne Bennett.
O sikoa na maua e Jack Reed ma Corey Oates mo le Broncos faapea sala na ova a Corey Parker ma le tolu a le Kaupoe na laasia e Justin O’Neill, James Tamou ma Kyle Feldt.
