O le taamilosaga i le lakapi taitoafitu i lalo o le polokalame faaauau a le Aumaga Sa‘oao Pasefika Trust i Ueligitone mai le tausaga 2003 na uluai faavae ai, o loo taiulu ai Anthony Leaupepe (Fasitoo & Salelologa), sa faapea ona malaga i ai nisi o ‘au mai Kalaiesetete i tausaga ua mavae.
Peitai i le tausaga 2008 na faato‘ā faia ai ma faataunuuina taaloga i totonu o le aai.
Na faaalia e Leaupepe i luga o le faatalanoaga i le polokalama leitio “Penina o Samoa”, o loo fia soosoo tau‘au mai pea i autaalo a Kalaiesetete auā le fetufaaiga i le finauina o lenei faagatama, o le faatupulaia o le malamalama ma faamasani i isi tupulaga faapea ma le faamalosia o le aganuu Samoa.
O le Aso Toonai 27.11.2010 sa faataunuuina ai le taamilosaga taitoafitu i le Linwood Park.
E toavalu aulakapi sa lesitalaina mo le faamoemoe, o le aso foi lea sa faia ai le isi taamilosaga taitoafitu na auai atu i ai nisi alo Samoa. Masalo o le ala lea na laititi ai le fuainumera o au taaalo.
A o lei amataina le taamilosaga sa muamua le tatalo faafetai mo le talosiaina o le faamoemoe, ona alo atu lea i le polokalame sa faatautaia lava e le susuga Anthony Leaupepe ma le fesoasoani a lona faletua sa auai.
O ‘au uma sa taaalo ia o tamafanau uma o le atunuu, maitauina foi le toatele o tama aoga, aemaise tupulaga feololo. Vaaia foi le au matutua na taaalo mo lenei lava taamilosaga, e pei o le kapeteni mai Aana, Apoua Mataafa, e tiga le lapoa ae pei o le vaalele le tamoe a le tamaloa.
O le finauina o le siamupini na taalo ai Aana Boys faapea Samoa United lea sa siamupini i le 2008, ma o se taaloga mataina le taufai malolosi o ‘au, e uma a‘e le taaloga e tutusa i le 19 -19, peitai na toe faaopoopo le isi sefulu minute ma manumalo ai Aana Boys ina ua latou muamua maua le sikoa.
Na sosoo ma le laugatogi e pei ona tauva i ai: (Bowl) 1- Samoa Ula, 2- Malisi, (Plate) 1-Malisi (o le faalua ai lea na manumalo) 2- Lotofaga (o le ‘au fou faato‘ā faaulu i le 2010). O le manumalo i le talita ua siamupini ai Aana Boys (faiaoga Ah Key Salave), mai le Samoa United (faiaoga Sooalo Alatimu Iese).
Na tauaaoina teutusi mo faailoga o ‘au lautogia, faatasi ma ipu ua na o au lakapi sa tulaga muamua.
O le fetalaiga Sooalo Alatimu sa fai ma fofoga taumomoli e faafetaia galuega uma o le aso ma polokalama faatulagaina, ona faaiu lea i le tatalo na saunia e le alii taalo malosi mai Samoa United o le susuga ia Finauga, taape le aofia na auai ina ua iu i le manuia le faamoemoe.
