Oloo faia feutanaiga ina ia mafai e vaalele tetele o isi atunuu ona afea Samoa”… Palemia
Ua malaga i fafo le toatele o lo tatou atunuu ma maofa ai i fausaga o fale o malaevaalele tetele o atunuu ua maualuga lo latou tulaga i lea auaunaga. Sa na‘o na moomoo ma talotalo maumau pe ana faapea ni fale ole malaevaalele faavaomalo i Faleolo.
Ua tuanai na tausaga ma taimi ae o lea ua faatoa taunuu le miti ma manaoga sa iai e faafetai ai le Malo o Samoa ile saili auala e mafai ona fausia ai ni maota faapea ilo tatou malaevaalele faavaomalo.
O Saina na tali mai ile sāvali ale Malo mo se nonogatupe e māmā le tului e faatino ai se galuega mo maota faatali pasese ma maota e faaee ai pasese. E lē gata i ia vaega ae ose fausaga e pei o atunuu i fafo e sau lava le vaalele tele tu ile vaega e mafai ona malaga sa‘o ane lava pasese taunuu ile fale e aunoa ma le lāina pe timuia, poo le agai sa‘o ane lava mai le fale faaee pasese ulufale loa ile vaalele.
O lea la ua tatala le vaega muamua ole galuega ole maota e faaee ai pasese. Ole Aso Lulu ua mavae, le aso 30 0 Novema 2016 na patipatia ai ele Malo ma le atunuu le tatalaina aloaia o lea vaega ole galuega.
Ose fale ua iai totoga faaonapo nei e siaki ai ato ma pepa malaga faapea le saogalemu ma le puipuigamalu o tagata malaga ma vaalele. O isi vaaiga matagofie o uati ua faailoa ai taimi eseese o atunuu ole lalolagi e malaga iai vaalele mai Samoa.
E fogafalelua; ole vaega i lalo e siaki ai pepa malaga ma ato faapea uta, ae ole fogafale i luga e agai iai mo le siakiina o pepa malaga mulimuli ma saili le faitotoa poo le Gate e maua ai le vaalele e fia malaga ese ai.
Ua iai ma faleoloa mo oloa e lē tiuteina poo le duty free shops. E faapena foi ona iai ma pisinisi e maua ai sina meataumafa ma se vaiinu malulu poo se ipu kofe vevela. O vaaiga uma ia sa iai muamua, peitai ua sili atu le tulaga ua iai nei ina ua tatala le maota faaee pasese fou e 31.7 miliona tupe Amerika lona tau. Faaalia ele taitai ole Malo le afioga ile Palemia, o fuafuaga ale pulega o malaevaalele ale atunuu ia avea Samoa ma taula‘iga o malaga faavaomalo mai isi atunuu. Ole taimi nei oloo faia feutanaiga mo le afea e vaalele o isi atunuu ole malaevaalele i Faleolo, e pei ona iai se maliega ua mae‘a sainia e Samoa ma Saina e mafai ona afea ai Samoa e vaalele tetele o lea atunuu.
Oloo faia foi talanoaga ma feutanaiga ile taimi nei mo le toe faatuina ole kamupani vaalele a Samoa ole Polenisia mo malaga i isi atunuu ole lalolagi. Ole itu i Sasa‘e ole maota fou ua tatala ua siitia iai le siakiina o malaga mai fafo faapea ai ma le vaega o uta poo le cargo. Ole itu i Sisifo ole maota faaee pasese fou ole a talaina i lalo mo le fausia ole vaega lua ma le tolu ole galuega atoa. O Aokuso ole tausaga fou oloo fuafua e faatoa tatala ai ma ole a iai loa ma auala e pipii ile faitotoa o vaalele mo le faaaogā e pasese.
