“O le feutanaiga lea ua faia ma le Matagaluega o le soifua maloloina”..sui Komesina o Leoleo
O lea ua taoto nei se fuafuaga a le Matagaluega o Leoleo ma Falepuipui ma le Matagaluega o le Soifua Maloloina, ua tapena lelei se galuega mo le siakiina o Malu o le Malo poo leoleo o loo galulue nei i atunuu Aferika pe a taliu mai i le atunuu, mo le fia puipuia o le atunuu mai le faama‘i taufaafefe o le Ebola lea ua lata i le lima afe tagata ua maumau ai soifua.
O atunuu o Liberia ma Sudan o loo galulue ai nisi o leoleo e lē itiiti ifo i le toasefulu mo le tausiga o le filemu i le polokalame a Malo Aufaatasi o le vaaia o le filemu o nisi o atunuu o le lalolagi o loo aafia i vesiga ma taua faalotoifale.
“O le tulaga lena ua silasila i ai le matagaluega nei e tusa o se feiloaiga ma sui o le matagaluega o le soifua maloloina.
O le itu tāua lava ia mafai ona mautinoa le saogalemu o le atunuu mai lea faama‘i matautia lona saoasaoa ma le toatele o tagata ua maliliu ai i nisi o atunuu o aferika,” o le finagalo lea o le sui Komesina le afioga Afamasaga Michael Soonalole ina ua maua se avanoa o tusitala e faatalatalanoa ai ma fesiligia i nisi o mataupu tau solitulafono o loo suesueina e leoleo.
Na saunoa Afamasaga o loo saogalemu lava nofoaga o atunuu o Liberia ma Sudan o loo galulue ai leoleo mai Samoa, ae o le itu o loo silasila i ai le soifua maloloina e tatau lava ona siaki lelei pe quarantine pe a malaga mai i Samoa ia leoleo i soo se taimi e tuua ai atunuu aferika o loo galulue ai ae toe foi mai i lo tatou atunuu.
Faailoa mai foi e le sui Komesina, o loo silasila toto‘a fomai a Malo Aufaatasi i le saogalemu o leoleo mai Samoa aemaise o isi foi leoleo mai isi atunuu o loo tautua mo le puipuiga o le filemu i atunuu uma ua aafia i le faama‘i o le ebola.
O se feiloaiga ma le Faatonu sili o le soifua maloloina i se taimi e lei mamao tele atu na faaalia ai e le alii fomai le tofa Leausa Dr Take Naseri, ua taoto tapenaga a le matagaluega mo le ebola e pei ona aoaoina fomai ma tausi soifua i gaioiga uma e tatau ona faatino pe a iai se tasi e aafia, aemaise o se potu i le malaevaalele i Faleolo e muamua faleesea ai se tasi ua masalomia, ona faatoa momoli sa‘o ai lea i le falemai ua iai nei i Faleolo mo isi gaioiga.
E ui ina saogalemu soifua o leoleo mai Samoa o loo tautua nei i le puipuiga o le filemu i atunuu Aferika ua aafia, ae o le faia o le gaioiga talafeagai mo puipuiga o le mafuaaga lea o le tapenaga ua iai nei mo leoleo e toe taliu mai i le atunuu pe a mae‘a ia tiute, poo le toe malaga mai foi i Samoa pe a iai nisi fuafuaga lē ma‘alofia.
