Sese tuua‘iga kalapu lakapi Vaitele United

Ua lē ‘asa pea ona tulai mai vevesi i taaloga lakapi i Samoa e lē gata i taaloga a a‘oga ae faapea foi i taamilosaga a iuni faaitumalo.
Ua teena e le Peresitene o le kalapu a Vaitele United lipoti na salalau i le mafuaaga ma i latou na auai i le vevesi na faia ai se tau‘aiga maa ma taei ai ai tioata o se tasi o faleoloa i Vaitele-tai, i le tolu vaiaso ua tuanai.

O le avanoa na molimauina ai e le tusitala le tauaaoina o togiga lakapi fou a le kalapu, na maua ai ma le avanoa e fesiligia le peresitene i le vevesi na tulai mai ma aafia ai se alii talavou o le nuu o Vaitele-tai lea sa taofia i le falemai mo nai vaiaso ona o manu‘a tugā.

“Faafetai o lea ua maua se avanoa e avatu ai se faamatalaga. O le mea moni e leai nisi o le matou kalapu poo ni tama taaalo na iai i le vevesi na taei ai tioata o le faleoloa ma faamanu‘alia i se alii talavou”. O le faamatalaga lea a le peresitene ina ua fesiligia.

“O le vevesi lava ia na tupu i le malae i nisi o le au tapuai a le aulakapi a Afega ma le au tapuai sa lagolago i le matou ‘au, na uma ai lava i le malae le faavesivesi, ae o le faalavelave ua omai lava isi tamaiti o le nuu o Vaitele-tai e le iai i le kalapu ma taofi le pasi a Afega i luma o le faleoloa o Farmer Joe ma fai ai loa vevesi tele”.

Faaalia e le peresitene na faia le faasalaga o le latou kalapu ona o lea tulaga na aliali mai, ma sa lē mafai ona taaalo i le Aso Toonai e tasi ma le salatupe e $1,000 tala. Peitai ina ua avatu se matou faamatalaga i le pulega o le Iuni lakapi a Apia i Sisifo, sa toe liuliu le faaiuga ma tuu ai i lalo i le $500 tala le sala”.

O le kalapu o loo auai nisi o alii talavou o Vaitele-tai ae toatele foi alii talavou ma nuu tuaoi o loo faamaopoopo ma taaalo i le Senior-A ma le Under-20 a le kalapu e pei ona faaalia e le alii Peresitene.

O vevesi na aliali mai ma ta‘uleagaina ai le igoa o le Vaitele United ua sauni le kalapu e puipuia le toe aliali mai o nisi faaletonu ma vali uliuli ai ma le tulaga tauleleia o le latou kalapu i le silasila a isi kalapu lakapi o loo latou milo faatasi i le Iuni lakapi a Apia i Sisifo.
O togiga e lua ua faamanuiaina ai ‘au e lua a le kalapu sa faameaalofa mai e se tasi o alo o le afioaga o Vaitele-tai le afioga Tagaloa Tasesa e aumau i Ausetalia, ma o lona tina i Samoa o Emeline ma ona alo sa tauaaoina le foai.

O loo iai foi ma le lagolago a le kamupani o le Rees Hirage lea o loo pulea e le afioga Leota Sami Leota, o ia foi ma le kamupani na fesoasoani i le aumai i Samoa o le meaalofa o togiga e lua.