Ile finau mai ai o ‘au e sefulu ma le ono a alii ile taamilosaga ole PIMKA i lenei tausaga, na totoe mai ai ‘au e 8 i luga ole top 8 e saili ai ‘au e fai agai iai le semi fina ma le final. Ole top 8, e aofia ai le Povi Poa lea e leai sana pa‘ū ile POOL A faapea le Kanana Fou ile POOL B e leai foi sana faia‘ina ona sosoo lea iai o isi ‘au e taitasi faia‘ina ma le tailua faia‘ina e pei ole Malaka, Loto Taumafai, ma le Maata, Amoa i Sisifo, Ao Atua, ma le Maa Pupula.
Ile faagasoloina ole quarter final na fai ai loa seiga pepa i ‘au taitasi, e fai ai le pa‘ū ma nofo, lea na taaalo ai loa le Povi Poa ma le Amoa i Sisifo, Maata ma le Maa Pupula, Ao Atua ma le Malaka, Loto Taumafai ma le Kanana Fou.
Ole iuga na iai lenei taamilosaga, na faasaofai ai ele Amoa i Sisifo le Povi Poa le taitai ole POOL A, ae faanofo lelei ele Loto Taumafai le Kanana Fou le siamupini ole POOL B, ole Maata na manumalo ile la taaloga ma le Maa Pupula ae tape ele Ao Atua le tv ale Malaka.
Ole tele ole laualuga o manatu o tagata maimoa ma le tapuaiga ale atunuu e ono suipi se ‘au ole Povi Poa poo le Kanana Fou, ae o nisi na lagona e faapea e ono sola ma le Tama ole Malaka le taamilosaga o lenei tausaga.
Ae peitai ina ua mae‘a le quarter final ma vaaia ai le telē ole suiga o manatu o tagata ina ua lē ausia ele Povi Poa, Tama ole Malaka faapea le Kanana Fou le semifinal ina ua faia‘ina ia latou taaloga.
O petipetiga o manatu ole ‘au maimoa ua agai loa ile Ao Atua ma le Amoa i Sisifo auā o nisi ia o ‘au malolosi lea ua sao mai ile semifinal, ma o ‘au foi nei sa saili siamupini ile tausaga ua mavae. O nisi ua agai lagona ile Maata auā o lea ua toe pisapisao ai foi le alii kapeteni tino laitiiti ia Soe lea ua iloga ile taaloga ile faamalosiau pe a oo ile taimi e vevesi ai le taaloga i taimi faapenei.
Ole semifinal na taalo ai loa le Ao Atua ma le Maata, ma manumalo ai le Maata ae ole Amoa i Sisifo ma le Loto Taumafai na manumalo ai le Loto Taumafai.
Ole mae‘a ai o taaloga ole semifinal, na lē toe iai loa se manatu e auese mai ile ‘au e tatau ona manumalo ile PIMKA ole 2017, ua mate uma loa le toatele e sola le Maata ma le ipu o lenei tausaga. Peitai ua lē ogatasi le futia ma le umele, ua lē tutusa foi manatu ma lagona ole autapuai ma le faatinoina ole taaloga e ono suipi ai le Maata ile Ipu.
Ose taaloga mataina le sailiga siamupini ole taamilosaga ole PIMKA ile va ole Loto Taumafai ma le Maata, ae ose vaaiga sili ona matagofie ile maimoa ale atunuu ole taimi ua luluti ai le taaloga, ina ua migoi faatasi polo oloo totoe ma ‘ai oloo totoe, ae ole taimi foi lea ua iloa ai le kapeteni i taimi faigata ole taaloga.
Ile faaiuga ole taaloga na totoe polo e 3 ae toe tasi le ‘ai ma le ‘ai faasili. Ole alii o Vaega ole faatea lea ale Maata ua iai le ola ma le oti ole ‘au, auā a misi le ta ua totoe ai polo e lua ma ‘ai e lua, ae pagā lea ua faama‘ati mai foi le pupula ale alii o Leilua ma vilivili lana pate auā le momoliga ose lua i tua ole ova e manumalo ai le Loto Taumafai, ma sa taunuu lava le sausau ale alii o Leilua ina ua lave lana ta maua ‘ai e lua ma manumalo ai loa le Loto Taumafai ina ua maua ‘ai ae totoe ai polo e lua ole taaloga.
Iuga o Taaloga a Alii
1. Loto Taumafai (Siamupini)
2. Maata
3. Ao Atua
4. Amoa i Sisifo
Ole iuga o taaloga a tamaitai, ose tasi lenei o ‘au sa mamao ai foi manatu o tagata matamata e ono suipi ile taamilosaga lenei a tamaitai, le Katoliko Glen Innes, ona sa tau sue mai sona avanoa e ono sao mai ai i luga ile Top 4.
Ae ina ua maua lona avanoa sa taaalo loa ma le Dale State ile semifinal ae ole Vaipuese ma le Firebirds ile isi semifinal. Na manumalo le Katoliko Glen Innes ile la taaloga ae manumalo le Firebirds ile Vaipuese ma saili ai loa ele Katoliko ma le Firebirds le siamupini ma manumalo ai le Katoliko Glen Innes ile taamilosaga a tamaitai.
Iuga o Taaloga a Tamaitai
1. Katoliko Glen Innes
2. Firebirds
3. Vaipuese
4. Dale State
Ile taimi ole laugatogi na tufatufa ai loa faailoga poo ipu ma teutusi i ‘au ua siamupini ile taamilosaga ole 2017, faatasi ai ma seleni na tauaaoina atu mo kapeteni ma komiti sa fitaituga ile faafoeina o taaloga.
E lē gata i lea ole saunoaga faafetai ale Konesula o Samoa le afioga ia Faolotoi Reupena Pogi ile komiti faafoe ole PIMKA ile faafoeina o lenei taamilosaga oloo vaaia ai le nofo lelei ma le nofo fealofani ole atunuu oloo i Aotearoa nei, ae lē gata i lea oloo lalaga ai le taleni oloo i fanau.
Ole agaga faafetai ole taitaifono ole PIMKA le susuga Noa Sola Sa‘u Tafeaga sa fai ma fofoga ole komiti o taaloga, i susuga i kapeteni ma ‘au taitasi ile faatinoina ole taamilosaga i lenei tausaga, o lea ua faaiuina ma le manuia ae oloo tumau pea le fiafia i tagata uma.
Ole agaga faafetai foi na saunoa iai le taitaifono ile saofaiga a susuga i faafeagaiga sa auai e tapuaia taaloga i Aso Toonai taitasi, ma ua maualuga ma matagofie ai le faamoemoe. Ma ua tapunia aloaia ai le PIMKA i lenei tausaga seia oo foi ina aulia le tausaga fou ile alofa ma le agalelei ole Atua.
