Ua alu le amataga o lenei vaiaso o faasalalau e leitio ma upega tafailagi le lavevea o ni leoleo se toalua a le Matagaluega o Leoleo i Samoa, ona o se osofaiga na faia e leoleo i le faaiuga o le vaiaso na tea nei.
O lea osofaiga na toe agai ai leoleo i se nofoaga i Tiavi ona o le masalomia o loo iai lava laau maruana e lei maua e leoleo i lana osofaiga muamua.
O le lua vaiaso talu ai lea na tulai mai ai le osofaiga lea na aumai ai e leoleo laau maruana mai i se nofoaga i Tiavi. Peitai o lea na toe alu le isi osofaiga a leoleo i le taeao o le Aso Tofi na se‘i mavae atu nei lea la e feaveai ai faamatalaga e amata mai faapea ua iai nisi ua maliliu i lea osofaiga ma e toalua leoleo na lavevea mai ai.
Faaalia e le Komesina o Leoleo ia Egon Keil e leai ma se tasi na lavea i lea osofaiga ona o lea na alu ai foi ma ia. Faaalia e Keil e tusa ma le to‘a 20 leoleo na o latou agai faatasi ina ua maua mai nisi faamatalaga mai tagata o loo fesootai ma leoleo e faapea o loo iai lava maruana i tagata nei na taofia i le osofaiga lea na faia muamua.
Ta‘ua e le Komesina na agai atu ae e leai ma se laau na toe maua i nofoaga na asia e leoleo ma faagasolo ai a latou suesuega. Ta‘ua e Keil sa faapapa e se tasi se fana i le ea ae e lei iai se isi na lavea.
Ta‘ua e le taitai leoleo o le suesuega lea e na o le lua laau malosi na foi ane ma i latou i le ofisa o leoleo ma ua faatalatanoaina foi i le taimi lenei ni alii se toalua na maua atu i lea nofoaga ae e lē o iai ni moliaga ua faia i le taimi lenei. Ae i faamatalaga ua agiga nei e lē faamaonia.
Na fesootai atu foi i le falemai e vaavaai pe moni na avatu ni leoleo lavevea ae o nisi foi na maliliu ai i lenei osofaiga ae o le faamatalaga a le ofisa o le soifua maloloina, e leai ma se isi na avatu i le taeao lea o le Aso Tofi poo se isi foi aso i tua mai.
E ui i lea o loo vaaia pea le aumai o lipoti i luga o telefoni e faatatau i lenei faalavelave ma faamatalaga lava ia ua lavevea ai leoleo ma nisi i lea osofaiga. O lea ua saunoa le Komesina o Leoleo ua lē faamaonia ia lipoti.
