E tiga le maligi faavai o timuga i le Aso Toonai aso 2 o Mati, ae lei masino le tele o fuafuaga faaleekalesia sa faataunuuina i lea aso. E lē gata i lea e lē fiu le auauna tapuai a le tagata Samoa pe a manuia ma fiafia le loto.
Na tauaofai le Semina e aofia ai susuga i Faafeagaiga, Aoao, Tiakono ma o latou faletua o le Matagaluega a Kuiniselani Ekalesia faapotopotoga a le Atua i le itu palagi.
O le ‘auga o aute, ina ia toe faamalosia le aufaigaluega ma tomatauina i le itu faaleagaga e ala i Afioga Paia a le Atua ma se upu faalaeiau mai le taitai, le susuga ia Ps Onesemo Pulepule e pei ona malaga mai Melepone.
E tolu pulega, ma o se faamanuiaga mo tagata lotu aua ua o se ligoligo le lealea o le ti‘a faaleagaga sa faalele ma folafolaina e le aufaigaluega Paia a le Atua aemaise le Taitai Aoao sa malaga mai Melepone.
O nisi o le faigamalaga e aofia ai Ps Onesemo Pulepule ma le faletua, sui e to‘a 2 o le komiti, Susuga ia Ps Lealofi Tuigamala faapea Ps Enele. Sa tuufaatasia le matagaluega ile afiafi ole Aso Sa ma ta‘ape ai le fuamanusina i le aso na sosoo ai, Aso Gafua, aso 4 o Mati.
