Sa faafiafiaina le Ekalesia Worship Centre a Kuiniselani i le auai mai o le susuga i le Aposetolo, Pastor Viliamu Mafo‘e o le taitai aoao ole Ekalesia i le lalolagi. Sa faagasolo mai le Semina i lenei weekend.
Sa ia faamamafaina i lea Semina le Tusi o Faaaliga, o loo molimauina ai upu faavaloaga. Ua mautu le taofi ma ua iai le faamoemoe i le Aposetolo e ao ona a‘oa‘o tagata lotu i upu o nei valoaga.
Sa auai le toatele o ekalesia taitasi a le Worship Centre ae tainane le loaloa o le mamalu o le atunuu mai isi ekalesia.
Ua mae‘a Niu Sa Uelese ma Vitoria ae o le semina o le vaiaso nei sa faatasi mai le taitai i Kuiniselani, faasolo atu ai i Niu Sila ma faamae‘a ai i Samoa.
E lē gata i lea ae sa potopoto le tele o ekalesia a le Worship Centre ona o le faiga taulaga a ekalesia eseese i Kuiniselani talu ai o loo iai pea le manaomia i totonu o le galuega a le Atua.
O le susuga foi i le Aposetolo o ia o le taitai o le faapotopotoga a le “One in Christ” (Tasi ia Keriso) i Samoa. O le itu lelei o lenei mafutaga, e mafuta ai ma galulue faatasi le fanau a le Atua mai isi ekalesia.
