Na matuā faatumulia le faleie i totonu o le lotoā a Ferguson Intermediate School i le Aso Tofi na tea atu nei i mātua ma aiga auā foi le fia faafofoga atu i seleselega a le fanau e tusa o a latou taumafaiga aemaise poo le ā se tali mai a fanau i le galuega faaauau a mātua i le lagolagoina o fanau i lenei foi tausaga ma a latou aoaoga.
E uigaese foi le faatinoga o polokalame faaleaoaoga a lenei aoga auā na maitauina le faalauiloaina o le tomai o fanau i mataupu taitasi uma na aoaoina ai i le tausaga atoa.
Na maitauina le agavaa tele o fanau i le itu i taaloga auā e tele ni faailoga na faasafua mo fanau uma na fai ma sui o le aoga i soo se taaloga o lenei foi tausaga.
Na faailoa mai foi e se tasi o faiaoga o lenei tausaga ua suia ai le faatinoga o le polokalame o le laugatogi ua tuu faatasia ai taaloga ma le tulaga aoaoina (Sports & Academic & Prize Giving) ma o le ala umi lea o le polokalame o lea aso.
Na vaaia le taupati fiafia atu o mātua e faailoa atu lo latou titi faitama i nai o latou fanau e ala i le faaulaina ma le foai atu o nai meaalofa mo fanau a o agai atu i le tauaaoina mai o a latou faailoga.
Na saunoa le taitaifono o le pulega e faafetaia le galuega fita a le tamaitai puleaoga aemaise o le vasega o faiaoga auā o lea ua mae‘a foi galuega ma aoaoga o lenei tausaga ma le manuia.
