Ua faalauiloa mai nei i tua le CD pese lona tolu poo le Volume 3 a le alii talavou o Terence Jr Tiumalu poo Young Meko e pei ona lausilafia ai. O lana CD lenei o loo faaigoa “Seki A Oe”, lea foi e faaigoa ai le pese lona tolu.
Ua 19 tausaga o Terence, ma o le molimau a lona tamā, mai lava a o laititi lona atalii, e naunau tele e pese ma faaaogā mea fai fa‘ili.
O inā na ia mautinoa ai, o se taleni lenei o le a naunau i ai le atalii a o tuputupu a‘e.
O le isi itu na atili ai ona uunaia le fiafia o le alii o Terence i le musika, auā o lona tuaa, o Pauli Panisa Tiumalu, o se tasi ua leva foi ona ia faia le pisinisi o le faatauina atu o CD pese.
O se pisinisi na amata atu i Niu Sila i le vaitau o le 1990s, i Otara ma Magele, seia oo ina see atu le aiga i Sini Ausetalia i le tausaga e 1996 ma faaauau ai pea lenei lava pisinisi.
O se tautua ua taufai galulue uma i ai le aiga, auā o le alii o Terence e lē gata ina talenia i lona siufofoga, ae mafai foi ona ia tuufaatasia lava e ia le pueina o ana pese, ae galue malosi lona tuaa i le maketiina o ana CDs, taimi e tasi e fesoasoani foi i lona atalii i le faaupuina ma le sailia o ni fati talafeagai o pese.
O le filifiliga o ituaiga o musika e faaaogā e pei ona ia ta‘ua, e lē o taotasi i se vaega o tagata faalogologo.
E iai ana pese e logomālie mo le faafofoga a nai tamā ma tina matutua, e iai pese faaleagaga, o pese faaonaponei i upu ma fati; atonu o le vaega tonu o tupulaga talavou o loo agai tonu i ai. Tasi le itu na faamamafa mai e Terence ma lona tuaa, o loo faamautinoa ia logoleleia le gagana o loo faaaogā e le atalii i ana pese, ina ia mālie i le faalogologo a tagata, a o le sili, ia maua ai se viiga o le Silisili Ese na foai maia le taleni i lenei alii talavou.
O loo iai Terence ma lona tamā i Aukilani i le taimi nei i le faalauiloaina o lana CD, ma e iai foi le faamoemoe e fia oo atu i Samoa mo le faamautuina o se isi la maketi mo le faatauina atu lava o musika.
O tuaa o lenei alii talavou, o le afioga ia Pauli Panisa Tiumalu mai afioaga o Salelologa, Faala i Palauli, Fasitootai ma Satapuala, ma lona tina o Laina Tiumalu mai le afioaga o Salailua i Falealili.
Talosia ia solosolo manuia pea le taleni a lenei foi alo o le atunuu. E 10 pese o le CD, ma o se tasi o pese na ta‘ua patino e Terence, o le pese numera 7 o loo usuina ai e Vaaaoao Salumalo Alofipo & aiga le vii o le afioaga o Saleaula i Savaii.
