Se‘i o‘u siva faa-Samoa mo outou a o lei tuua le kuata muamua

O le vaiaso na tea nei i lona Aso Tofi na tele ina tuua ai aoga i le aai o Melepone, mai aoga tulagalua e oo i kolisi ma aoga maualuluga, i aoga a le malo ma ekalesia.
O le tele lava o aoga na fai a latou polokalame faapitoa mo alo ma fanau ma faamanatu ai le tāua o le Eseta lea e amata ai tuuaga.
O nisi o aoga tulagalua na fai a latou faaaliga pulou teuteuina o le Eseta ma tufa ai ma Easter Eggs, ae o le Meadows Primary School, na faataunuu la latou aso o tu ma aganuu, lea na faatino ai siva mai atunuu eseese.
E lei fia nofonofo foi la tama ma teine o le Manu, ona o le tasi lenei o tulaga e talenia ai tele nai o tatou tagata, e amata mai lava i alo ma fanau e oo lava i tuaa sinasina.
Na talisapaia e mātua Samoa le faatalauula atu a faiaoga mo se fesoasoani auā le a‘oina ma faataunuu se sāsā aemaise o le toe faloina o apaau malolosi o le manu, auā o fea lava e felelea‘i ma sailimalo ai nai o tatou tagata, e maau lava i faafiafiaga na fofoa ane i le soifua.
Molimau le sui o le Samoa Times lea e faiaoga ai ma fesoasoani i le aufaafiafia, na tulagaese lava le mataina o fiafia a nai alo o si o tatou atunuu, auā e momoli mai e taga faatino le uiga o upu o pesega. Na ta‘ape fiafia le aso o nai tamaiti, ae ua lele maualuga le manu ma talatalafulu i le faafetai ma le faamalo na molimoli i ai e le komiti faafoe.
E faatatafa manu uma o le atulaulau pe a saasaa ma faataupati tamaiti o le Manu Samoa.