Se‘i mai lava le pepe i lima o le tina e le au gaoi

O loo tau saili e le ofisa o leoleo ni lipoti ua oo atu e faatatau i ni pepe ua taumafai nisi e gaoi pe aveese faamalosi mai i o latou aiga. O le pepe na mafai ona maua e a tatou lipoti o se tamaitiiti e faatoa atoa i le vaiaso na tea nei le masina lona matua.

Sa leleo ma lona tina o Levesi Too i lo latou fale i Fasitoo-tai ae agai lona toalua ma lo latou aiga e ave le uncle o le tamā o le aiga i le falemai tele i Motootua. O le po o le Aso Lua a malama le Aso Lulu o le vaiaso na tea nei na tulai mai ai lea mataupu peitai e lei oo lava i leoleo Faaalia e le tamaitai ia Levesi, o le tea o le ‘afa o le 12 i le vaveao lea ae tu‘itu‘i atu loa se isi i le fale ae ua tagi foi lana pepe ua fia ai. Tago atu loa afisi mai le pepe ma agai i le faitotoa ma le manatu o le siigama‘i lea ua foi atu.

E lei tatala atoa le faitotoa ae tago sa‘o mai lava le alii o tagata e toalua na tutū atu i fafo, e fai uma mata pulepule ma taumafai e toso atu lana tama ae o loo ia sii le tamaitiiti. Na taumafai e toso ese lana tama ae unai ia i lalo e le tama lea ma tago mai le isi sa i ona autafa i le se‘i atu le pepe ma tamoe ma o le faliu a le tagata lona lua lea na ia vaaia ai loa o se tamaitai e enaena le foga o loo tautau mai i lalo.

Ta‘ua e Levesi na tamoe mai i fafo ina ua tu i luga ma vaaia se tamā ma sona atalii o savali ane i luma o le auala ma valaau ane loa mo se fesoasoani.  Sa ia vaaia se van e lanu meamata o matala mai le faitotoa toso ma na agai i ai le tamaitai lenei ma lana tama peitai o le taufetuli ane o le toeaina ma lona atalii na tuu ai loa e le tamaitai lea le pepe i luga o le aualatele, ae ua alu i le atoa le van ae tuli tamoe atu e le tamaitai lea ma le alii na tuleia le tina talavou lenei i le fale.

Faaalia e lenei tamaitai le faafetai i le toeaina ma lona atalii auā na tamoe atu le atalii ma sii i luga le pepe ma toe faafoi ane i lona tina ma faatonu loa Levesi e alu i le fale ma le pepe ma aua ne‘i toe tatala maia le faitotoa i se tagata e agai atu.

E lei agai le aiga lenei i leoleo ae na agai i se faipelē e tau saili ai i latou na faia lenei aga. O iina na faamatala atu ai se isi foi aiga i Leulumoega na faapea na tulai mai ai se tulaga faapea ae o lea la ua logo leoleo ma le faamatalaga o le a agai i ai mo suesuega ina ia saili tagata nei e ta‘ua le faia o nei uiga ae e lei maua lava. E ese foi nei lipoti ma o loo faamoemoe lava leoleo e toe agai i aiga nei ina ia auiliili mai faamatalaga o le mea na tupu, ma tau saili ai tagata nei ua tuua‘ia i le faia o nei uiga faasolitulafono.

 Le tina ia Levesi Too o Fasitoo-tai ma si ana pepe