Ua tolu ai nei o tausaga talu ona auai le ekalesia o le Rock of Ages i totonu o le polokalame a le Procare Health Limited, i le faatauaina lea o le soifua maloloina i tagata.

O le auai o lea ekalesia o le naunau lava ia maua se manulauti lelei i le soifua manuia ma le soifua maloloina o le tagata. Aua e tatau ona faataua i le tagata lona soifua maloloina lelei i le tino, e o faatasi ma le soifua maloloina lelei o le agaga.  E sefulufa ekalesia o loo auai ma galulue faipaaga i polokalame a le soifua maloloina i le faamalu a le Procare Health Limited. O nei polokalame o loo i totonu o Aukilani tutotonu (Auckland Central) ma o loo fatupeina lea e le ADHB (Auckland District Health Board). O polokalame e aofia ai le siaki a le teine tausi soifua, e aofia ai le toto maualuga, suka, gugu ma isi vaega faaletausi soifua.

Tausami soifua maloloina ma faamalositino, faaitiitia pe taofia le taumafa tapaa, tapueina o le silafia mo le gafataulimaina o gasegase tumau ma ogaoga, atoa ai ma isi vaega e pei o le faailoaina o le puipuiga o gasegase e pei o le fiva rumatika (rheumatic fever).

O le afiafi o le Aso Lua na tolaulauina ai faailoga mo ekalesia nei e sefulufa o loo aofia i totonu o lenei polokalame, ma o se afiafi matagofie ua mafai ai ona fesootai tagata o ekalesia taitasi ma galulue faatasi aua le faatauaina o le soifua maloloina lelei i le tagata.

O se molimau ola ma lelei lea polokalame aua ua fofola uma faamaumauga ma ripoti a ekalesia taitasi i totonu o le ofisa ma faailoa ai le tele o le suiga o le polokalame o loo faatinoina pea i totonu o aulotu.

Ua iai tusitusiga ma faamaumauga mai ekalesia ua iloa ai ua toatele tagata lolotu ua faaitiitia le lapopoa o tino po ua lusi foi le mamafa, ua iai foi nisi o ekalesia ua molimauina ua tuu ese e nisi le taumafa tapaa.

O le susuga ia Masuisui Sam Partsch faapea le faletua ia Litarina Maua Matau sa faafoeina polokalame o le afiafi ma sa faataunuuina lea faamoemoe i le hall a le ekalesia PIPC i Newtown. O le taimi muamua lenei ua see mai ai le talita o le tuufaatasiga o lenei polokalame i le itu i Sasae e pei ona manumalo ai le ekalesia o le Rock of Ages, i le tuufaatasiga o togi o vaega taitasi. Na latou mauaina foi le ipu o le faailoga o le ekalesia e pito sili ona tele pasene o pauna o tagata ua lusi le mamafa, faatasi ai ma tusipasi sa maua i nisi o vaega o lenei lava faamoemoe.

O le talita sa tele ina maua e nisi o ekalesia e pei o le EFKS ma isi aulotu ae pei o le taimi muamua lea ua se’i mai ai e le Rock of Ages le talita mai polokalame o le tausaga 2017 seia oo mai i lenei tausaga 2018.

O le susuga i le faafeagaiga ia Toomata Sione ma le faletua ia Sieni Sione o loo galulue i le tausiaina o lenei tovine.

O le tofa ia Tiatia Halefoti ma le tausi ai Sa’u Evelyn o loo taitaiina polokalame i totonu o lenei ekalesia.

O se fiafiaga sili i le tama faifeau ma lona faletua faapea lenei aulotu le faamanuiaga ua latou mauaina ai nei faailoga, aua o isi ia vaega taua o le ola auauna i le Atua ma lona finagalo.

Ia tatau ona tausisi le tagata ola i lona soifua maloloina lelei, ua le gata mo le viiga o le Atua e faamuamua ae ua siitia ai foi le tulaga o le ekalesia i nei polokalame.

O loo faagasolo pea nisi polokalame a le aulotu i le taimi nei e faamalosia ai pea le soifua maloloina o tagata lolotu e pei o taaloga ma le Zumba o loo faatino i afiafi o Aso Faraile.