Ole tausaga 2013 ile 2014 na faavae pe na amata galulue faatasi ai, le Asosi gaosi oloa a Samoa, le SAME, ma le faalapotopotoga lenei ole Pacific Island Trade and Invest i Niu Sila, ma o lenei polokalame ose polokalame faaopoopo lea i tiute ma gaioiga ale SAME ma le malo o Samoa e ala lea ile tau atinaeina pea o oloa a Samoa auā le auina mai i Niu Sila ma Ausetalia.
Mai ile 2013 na amata ai lenei polokalame ma o lea lava oloo mafai ona faaauauina lea faigapaaga ale SAME ma lenei faalapotopotoga seia oo mai lava ile taimi nei. E 40 kamupani mai Samoa sa mafai ona auina mai i ia tausaga e taumafai e faailoa a latou oloa.
Ole tausaga 2015 ile 2016 sa taumafai ai lava le malo ma le SAME e auina mai nisi o kamupani taitasi ina ia mafai ona faailoa pea le tele ole oloa oloo mafai ona gaosia ma fausia i totonu ole atunuu o Samoa. Peitai ole tausaga lenei 2017 e fā kamupani na filifilia e malaga mai e faalauiloa latou oloa ile Pasifika Festival.
E pei ole kamupani ole (1) Heavenly Water lea ua iloga foi lo latou tulai mai ile gaosia lea oloa e auina mai i atunuu ole lalolagi, pei ole siamupopo, ole vai ma isi oloa eseese, (2) Kamupani ole Vai, oloo latou auina mai le vai ma nisi foi o oloa, (3) Etu Life, oloo latou gaosia le Turmeric Juice poo le vai lega, lea oloo taumafaina auā le soifua maloloina o tagata ma le kamupani ole Samoa Mamanu Designs oloo mafai ona faalauiloa a latou mea taulima.
O nei pisinisi e fā o lea ua filifilia mo le Pasifika Festival o lenei tausaga auā o lea ua talafeauga lelei a latou oloa ma le auga ole faamoemoe ole Pacific Festival ile faafetauaiga o oloa nei e patino lava i tagata Pasifika.
Ma ole faamoemoe maualuga foi lea ole auai mai o nei kamupani e fā mai Samoa i aso e lua ole Pasifika Festival ina ia mafai ona faalauiloa a latou oloa faatasi ai ma le taliina foi o nisi o fesili ole a fesiligia ai i latou e nisi ole mamalu ole atunuu e tusa ai o oloa oloo gaosia lava i Samoa.
Ile saunoaga ale susuga ia Tagaloa Eddie L Wilson ole peresetene ole Asosi gaosi oloa a Samoa ole SAME, na ia ta‘ua ai le manuia ma le alualu i luma ole manaomia o oloa mai Samoa e o tatou tagata, aemaise ai o tagata oloo fai a latou pisinisi iinei i Niu Sila, ua latou matuā manaomia le tele o oloa nei mai Samoa ona e ese foi lo latou gaosiga faatasi ai ma le tofoina.
Pei la ole koko Samoa, lea oloo maitauina le manaomia tele e nisi foi o tagata mai Fiti ma isi atunuu faapea foi ma le peepee, e ui lava ile tele o isi peepee oloo gaosia mai nisi o atunuu ae lē o maua lava le lelei atoatoa ole oloa lea a Samoa e pei ona iai.
Talu mai le tausaga 2013 ile 2014 sa toe taufetuunai ai tau oloa iinei i Niu Sila ma ua maituaina ai le saoasaoa ole alu o oloa ma ua faatupulaia ai foi le tele o oloa ua auina mai fafo aemaise lava i Niu Sila ae le gata i lea ua tele ai foi ma oloa ua manaomia.
Ile taimi nei oloo galulue nisi kamupani i Samoa ile sukalati, nisi kamupani oloo galulue ile ‘ulu ma le talo ia tuu‘aisa, ma nisi o oloa e pei ole luau apa ma le peepee. Ma o nei oloa o lea lava ua amata ona aumai taitasi i atunuu i fafo.
Lea foi ua faailoa e Tagaloa Eddie Wilson ile taimi nei oloo tele foi le galuega ale malo ma le SAME oloo tau atinaeina ai oloa mo le tino, ma ua tele foi kamupani ale SAME lea ua iai ua latou gaosia nei oloa e pei ole kamupani ole Misiluki, faapea le Mai le Lagi ma le Coconut Love, lea oloo latou gaosia le uu manogi.
Ae faapea foi i galuega taulima, ole tasi lea galuega oloo taumafai foi lona atinaeina o oloa suisui poo galuega taulima, auā e iai le talitonuga a lelei lona fausiaina ma lelei lona faalauiloaina ma ole a lē taumate ole a tele ai foi oloa e manaomia atu i fafo. Ole eseesega la o oloa a Samoa ma nisi atunuu ole lalolagi, ona e iai nisi atunuu e fiafia tele latou ile laei Samoa ma meaai Samoa.
Ma ua faigofie nei oloa ile auina mai i fafo ona ole galuega soosoo tau‘au ale SAME ma le malo o Samoa ile faalauteleina ma le faaleleia atili o oloa Samoa ma ia maua maketi e auina mai ai oloa.
Ole Aso Toonai 25 ma le Aso Sa 26 o Mati sa faalauiloa ai nei oloa uma mai Samoa a‘o faagasolo le Pasifika Festival 2017, i Western Springs i Aukilani.
