Fono Samoa PIPC i le latou fonotaga

Fono Samoa PIPC i le latou fonotaga

O le aso muamua o le usugafono a le Fono Samoa PIPC i Aukilani na aloaia ai loa le avea o le susuga i le faafegaiga ia Rev Apa Lealiifano o le faafegaiga Glen Eden ma taitaifono o le Fono Samoa PIPC i le isi lua tausaga lea ua savalia.

Pei ona tauaveina mai lea tofiga e le susuga ia Rev Maafala Koko o le ekalesia PIPC New Town ae ua faasee tuagalu nei ina mae’a lana lua tausaga o lana nofoaiga. Ina ua mae’a ona faauuina o le tofi o le susuga i le taitaifono fou ia Rev Apa Lealiifano ona ia faaauauina loa lea o tiute a le taitaifono i totonu o le usugafono o le Fono Samoa e pei ona usuia nei i le tolu aso lea sa amataina mai i le Aso Tofi ae faamae’a i le Aso Toonai. O le Aso Tofi na amata le feiloaiga a matagaluega uma ma malo faaaloalogia i le ava o le feiloaiga, ma amata ai loa le sauniga lotu. Sa iai lava failauga filifilia o le fono ua uma ona lautogia e fai ma saunoaga autu o lea aso, ae na maualuga ai i lea taeao ona sa auai atu iai le afioga i le Minisita ia Aupito Su’a William Sio e fai sana saunoaga autu e uiga i le malo o Niu Sila ma lana faigamalo ma ana galuega faatino o lea ua agai iai le malo auā le manuia o aiga nuu ma ekalesia.

O le aoauli na maua ai se avanoa mai le susuga i le faafeagaiga ia Lui Ponifasio i totonu o lea fonotaga e faasoa atu ai i le tāua o le aano moni o le galuega faamisionare i totonu o atunuu i fafo.

O le tasi lea vaega tāua ua toe silasila iai le ekalesia o le Fono Samoa ua tatau ona toe faaauau auā le faaaogāaina o le soifua galulue i tupulaga talavou ma tagata matutua i totonu o le ekalesia. E tele polokame a tina sa faaauauina i lea aso faatasi ai ma polokalame a autalavou sa fai ma o latou sao i lenei fonotaga.

Tupulaga laiti o le lumanai o le galuega a le Atua i totonu o le Fono Samoa

Tupulaga laiti o le lumanai o le galuega a le Atua i totonu o le Fono Samoa

O le Aso Faraile na tulai mai ai le susuga i le faafeagaiga ia Rev Suivaia Te’o o le Sea o le Sinoti i Aukilani e faasoa lona ia foi auaunaga i le Atua i lea itu o le tovine ua galue ai. O ia o se tina muamua ua avea ma faifeau, ae le gata i lea o ia foi o se tina muamua ua filifilia e fai ma Sea o se sinoti i totonu o se ekalesia.

O nei galuega uma o polokalame ia a le Atua i le soifua ma le ola o le tagata. Aua e tatau ona faatuatua tagata uma i mea e lē o vaaia e pei ona aumai e le afioga a le Atua.

O le aoauli na faaauau ai fonotaga a le Fono Samoa i nisi o mataupu auā le agai i luma o le ekalesia ma le galuega a le Atua, ona sosoo lea ma le taumafataga ae faaiu i faafiafia a le matagaluega i Papakura. O le Aso Toonai na taualuga ai loa polokalame o le fono, i le saunoaga autu a le susuga i le faafeagaiga ai Rev Professor Dr Feleterika Nokise, ma faamae’a ai loa nisi mataupu o le fono e pei ona masani ai. O le aso foi lea sa aloaia ai le filifilia o le susuga ia Siitia Siitia Asi e fai ma taitaifono faaagaga mo le isi lua tausaga o lumanai i le 2020, faapea ona filifilia ai ma le susuga i le a’oa’o ia Tavai Meni e fai ma failautusi o le Fono Samoa, ae ua faaseetuagalu le susuga ia Rev Karima Fai’ai ona ua tele foi nisi o tiute ma galuega a le ekalesia o loo galue ai. O le sui failautusi o loo iai le susuga ia Rev Soosemea Faatui o le ekalesia PIPC North Shore ae o loo tumau pea tofi o le teutupe.

E 12 aulotu sa auai i lea fonotaga, mai matagaluega e 4 i totonu o Aukilani e aofia ai Otara, Manukau, Takanini ma Papakura. O Aukilani i Saute sa tali i le fono a le Fono Samoa i lenei tausaga ae o Aukilani i Sisifo ua tapena e tali mo le isi fonotaga i le 2020. Auā o le Fono Samoa e tailua tausaga ma usuia a latou fonotaga.

Rev Apa Lealiifano taitaifono Fou Fono Samoa PIPC

Rev Apa Lealiifano taitaifono Fou Fono Samoa PIPC